PGL – O subdirector do Galicia Hoxe, Xavier Cea, foi eleito presidente da Associaçom de Meios Escritos em galego (AME). Substitui no cargo o editor de Vieiros, Lois Rodríguez.
A AME nasceu em 2004 por iniciativa de Vieiros, A Nosa Terra, Tempos Novos, Galicia Hoxe e A Peneira, principais meios escritos em língua galega na Galiza com o intuito de defender os interesses das empresas jornalísticas que mantenhem os meios em galego, procurando o fortalecimento e assentamento do sector dos médios de comunicaçom e informaçom geral em galego no País.
Xavier Cea, subdirector do jornal Galicia Hoxe que edita o Grupo Correo Gallego, lembrou numha entrevista que «os meios em galego somos um factor fundamental da normalizaçom da língua, polo qual é normal que precisemos protecçom».
O trabalho da associaçom centra-se na presença em espaços de âmbito cultural e mediático para reivindicar um tratamento por parte da Administraçom que reforce os âmbitos estrutural, profeisional e tecnológico.
O caminho que aguarda a nova etapa com Cea ao frente tem como objectivo defender o papel dos médios escritos em galego e os alicerces da Lei de Normalizaçom Lingüística, num momento em que o Decreto do Plurilingüísmo ameaça com tornar mais precária a situaçom. «Para concorrer em igualdade de condiçons com a prensa escrita em espanhol temos que ter leitores competentes em galego. Se no futuro essa competência diminui, também suporá para nós umha desvantagem no mercado».
+ Ligaçons relacionadas:
- Xavier Cea é elixido novo presidente da AME [Vieiros, 07/06/2010]
- Cea presidirá a Asociación de Medios Escritos en Galego [Galicia Hoxe, 07/06/2010]
