O projeto Vitamina-G, criado na aula de 5ºC do CEIP Sagrada Familia da Corunha, aposta por umha focagem para a aprendizagem do galego através da criaçom de vídeos e conteúdos para redes sociais, onde o alunado é o protagonista.
A iniciativa, liderada pola mestra Mariña Lema, surge da necessidade de fomentar o uso do galego no centro, especialmente entre o estudantado que nom tem contato com o idioma fora da matéria específica. O projeto procura reverter esta situaçom, com umha focagem criativa, expondo a língua em contextos reais e atraentes para a mocidade. Ademais de promover também outros recursos culturais em galego, como a música.
Redes sociais e vídeos para ativar o galego
Um dos aspetos fundamentais de Vitamina-G é a criaçom de conteúdos audiovisuais. A iniciativa começou em outubro com um vídeo sobre o Samaín, focado na aprendizagem de vocabulário. “O vídeo ajudou-hes a incorporarem palavras novas de jeito natural”, explica a docente.
A partir de aí, a demanda foi em aumento. “Outras turmas pediram mais vídeos: para o 25N, para o Nadal, para projetos ambientais…” . A chave do sucesso foi fazer que se sentissem protagonistas. “Querem ser youtubers, tiktokers, influencers, assim que ver a sua própria imagem nos vídeos e partilha-los foi umha motivaçom extra”, comenta Lema.
O proxecto saiu das portas do centro educativo em janeiro, através da sua conta de Instagram, e estabelecendo contato com outros centros e equipas de dinamizaçom linguística. Ademais de potenciar a aprendizagem do galego na aula, o projeto está a ter impacto nas famílias do alunado.
