O próximo dia 9 de fevereiro, quinta-feira, às 18h decorrerá na cidade da Corunha umha visita dobre, em dous turnos a ambas instituiçons da cidade, organizada pola Asociación Cultural Alexandre Bóveda.
Durante a visita, guiada por Rosario Aja, directora da Biblioteca da Casa do Consulado e mais por Felipe Senén e Juán Durán, membros numerarios da Real Academia de Belas Artes, poderám ver-se peças do fundo Arquivo Musical de Galiza, como O Mariscal, a primeira ópera galega entre outras.
A Biblioteca da Casa do Consulado, é a primeira biblioteca pública em estabelecer-se na cidade da Corunha baixo o amparo do “Real Consulado de Mar e Terra” em 1803 e aberta ao público em 1806, pertence à fundaçom cultural privada mais antiga do Estado. Foi no seu salom de atos onde se celebrou a constituiçom da Academia Galega o 4 de setembro de 1905. Em esta instituiçom podem-se ver, entre outros fundos, um incunábulo de 1498, um manuscrito de Quevedo, a biblioteca de José Cornide e de Juana de Vega, ou documentaçom relativa à Sociedad del Folklore Gallego que impulsou Emilia Pardo Bazán e que foi iniciadora da Real Academia Galega.
A Real Academia Galega de Belas Artes, foi umha das treze criadas no Estado espanhol polo Real decreto do 31 de outubro de 1849, entom com a denominaçom de Academia Provincial de Belas Artes. Dependente inicialmente desta Real Academia de Belas Artes criaram-se, em 1854, os estudos de belas artes que constituíram a iniciaçom da escola de belas artes e o Museu chamado nesse momento Museu Provincial que é a base do atual Museu de Belas Artes.
As prazas som limitadas, assim que para assistir cumpre apontar-se o formulário que oferece a Associaçom Cultural Alexandre Bóveda aqui.
