PGL – A Conselharia da Cultura e o Turismo respondeu a pergunta parlamentar apresentada polo BNG sobre envio dumha carta em espanhol polo director-gerente da Sociedade Anónima de Gestom do Jacobeu numha comunicaçom sobre subvençons a congressos e outros actos públicos.
A missiva informava do fim do crédito destinado para o patrocínio de congressos, simpósios, seminários, encontros, cursos e jornadas no nosso país com motivo do Ano Jacobeu 2010.
O uso do castelhano em lugar do galego foi denunciado polo BNG. A resposta dada por Cultura atribui a um «simples erro pontual» este comportamento, circunscrito, segundo o departamento que chefia Roberto Varela, ao envio realizado entre os dias 8 e 18 do passado mês de Fevereiro, o qual provocou que a versom em espanhol, «dirigida exclusivamente a destinatários de fora da Galiza», chegasse a maos de entidades galegas.
Comportamento reiterado
Som vários já os episódios relatados pola nula implicaçom do Jacobeu nem só na normalizaçom da nossa língua, mas também no simples respeito a ela. Patrocínio e promoçom de webs sem exigir a presença do galego e, ainda mais grave, posta em marcha de páginas próprias só em espanhol som vários dos «erros pontuais» a que nos tenhem afeitos tanto a Junta como as entidades que dela dependem.
+ Ligaçons relacionadas:
- “Desrespeito e humilhaçom” cara ao galego por parte de um site do Jacobeu [PGL, 20/09/2010]
- O espanhol avança como língua de trabalho da Junta [PGL, 29/06/2010]
- Vários webs apoiados polo Jacobeu continuam em espanhol [PGL, 06/04/2010]
- Jacobeu e concelhos promovem umha web só em castelhano [PGL, 11/’2/2010]
