PGL – Pola primeira vez em 25 anos, o Centro Dramático Galego queda sem direcçom, depois de ser cessada Cristina Domingues. Com a medida, o CDG suspende a primeira produçom, que já tinha o elenco seleccionado.
A Asociaçomn de Actores e Actrizes da Galiza (AAAG), presidida por Vicente Montouto, acaba de remeter umha carta ao conselheiro da Cultura, Roberto Varela, na que o colectivo manifesta o estupor perante a destituiçom da directora do Centro Dramático Galego e a suspensom da próxima produçom, As actas escuras, de Roberto Vidal Bolanho, em período de pré-produçom.
Na missiva, intitulada CDG: Umha situaçom dramática, a associaçom exige que seja nomeado imediatamente um novo director ou directora do Centro Dramático Galego assim como a continuaçom da produçom prevista, os prazos e os compromissos adquiridos com os profissionais.
Relacionado com o anterior, tivemos conhecimento da trágica e recente desapariçom do Centro Coreográfico Galego (CCG) por causa da falta de apoio institucional. Semanas atrás, no PGL noticiávamos os comunicados de outras entidades, como o Ateneu Ferrolám ou a direcçom do Prémio de gaita Constantino Bellón, que já denunciárom publicamente os perigos da eliminaçom sistemática de ajudas por parte do actual governo da Junta da Galiza.
