PGL – A Associaçom Cultural Obreira Maçarico organiza um concerto da polifacética artista galega Ugia Pedreira junto ao reconhecido músico brasileiro Fred Martins. A actuaçom iniciará amanhã, dia 23, no Cabiria bar de Vigo por volta das 23h30.
O Cabiria bar da rua Afonso XIII viguesa acolhe umha nova actuaçom do duo formado por estes representantes da música lusófona, referentes a ambas beiras do Atlântico nas suas respectivas mães pátria.
A imponente voz de Ugia Pedreira, modulável e ninho de expressividade, junto a guitarra acústica e lirismo com base na bossa nova de Fred Martins, constituem um fluxo de intimismo e perfeita combinaçom, fruto da especial predilecçom e habilidade de ambos para juntarem estilos, vozes e músicas diversas. Para a ocasiom a guitarra e as vozes contarám com o acompanhamento dumha viola.
Ugia Pedreira, directora de aCentral Folque (antigo Conservatório de Música Tradicional de Lalim), compositora e cantante de Marful e de Nordestin@s, com Guadi Galego e Abe Rábade, conheceu Martins numha visita a Niteroi, na contorna de Rio de Janeiro, onde compartilhárom cançons e conhecêrom os parceiros do músico carioca. A consolidaçom da sua relaçom e o começo do seu caminho musical veu com o Ciclo de Músicas Portuárias 2009 de Ferrol. Em breve se materializará num trabalho disco-gráfico com composiçons próprias.
Para ver, mais umha vez em Vigo, esta particular fusom de lusofonia verbo-musical, haverá que achegar-se ao local Cabiria bar, onde se pode mercar a entrada (antecipada 5 €, no dia 6 €). Mais informaçons no blogue da Associaçom Cultural Obreira Maçarico.
+ Ligaçons relacionadas:
- Concerto: Ugia Pedreira + Fred Martins [ACO Maçarico, 17/07/2010]
- Web do Fred Martins
- Ugia Pedreira ‘amadrinha’ a quarta ediçom do DdoOLeR [PGL, 25/05/2010]
- Séchu Sende e o primeiro poemário de Ugia Pedreira inaugurarám o catálogo da ATRAVÉS | EDITORA [PGL, 20/05/2010]
