PGL – O CSA A Cova dos Ratos, na rua Romil nº 3 de Vigo, acolhe no próximo sábado, dia 18, a partir das 21h, a apresentaçom do segundo livro editado polo colectivo A Porta Verde, no qual se incluem poemas que representam a visom actual de poetas galegos contemporâneos.
O colectivo lírico continua um labor que engendra já a segunda publicaçom e que dá vida à poesia na Galiza, com escassos colectivos activos.
Neste Sétimo andar, poesía alén combinam-se umha série de visons heterogéneas sobre problemáticas sociais recentes: violência de género, exploraçom da mulher, imperialismo, a memória, o amor, o capitalismo, a morte… Todo um ronsel de sensaçons que pretende, a partir de versos do mais distinto e que tivérom o seu ponto de encontro na rede, achegar umha imagem da sociedade que nos levar a reflexons com o pano de fundo do anticapitalismo, compromisso social, nacionalismo ou independentismo.
Rosa Enríquez, Alberte Momán, Miguel Ángel Alonso, Ana Cibeira, Alfonso Láuzara, Alba Méndez, María N. Soutelo, Manolo Pipas e Ramiro Vidal som os autores das peças contidas no livro, «sem altas pretensons». O desejo é achegar a criaçom de poetas galegos e em galego, seguindo o trabalho realizado em décadas anteriores por outros colectivos líricos, como Ronseltz nos 80 ou Batallón Literario nos 90.
+ Ligaçons relacionadas:
- Apresentaçom em Vigo do novo livro de A Porta Verde [A Porta Verde, 27/08/2010]
- Portal do colectivo A Porta Verde
