PGL – O Teatro Arte Livre (TAL) de Vigo estreia a programaçom do segundo semestre do ano com a obra Cincenta – A gata Borrallenta, adaptaçom do clásico Cincenta polo autor Eisenhower Moreno. As encenaçons serám cada semana, sábados e domingos às 20h30.
Trata-se dumha adaptaçom livre de 50 minutos de duraçom, a qual é apta para todos os públicos, independentemente da idade. Desdobramentos de personalidade dos 4 actores num total de 9, a presença de 54 pistas de som e até 150 mudanças de luz som algumhas das técnicas mais impactantes introduzidas nesta obra.
Eisenhower Moreno realiza pola vez primeira um conto de fadas, o qual vê como mais umha vantagem mais ao poder viajar melhor com a imaginaçom. Também se refere às doses de realidade e interpretaçom que se podem topar na obra: “Nom gosto de impor verdades absolutas, mas sim que o público seja arrebatado pola realidade teatral e que me poda também agregar, mudar as suas próprias soluçons aos temas tratados”.
O projecto, no qual Moreno exerce de director-geral e de adaptaçom, é possível graças a Leandro Costas (produtor-executivo, administrativo e criador da caracterizaçom), Montserrat Fervenza, Maria Guiadanes (criaçom gráfica), María Graña e Roi Emmet, actores que procedem do Curso de Formaçom Teatral do Teatro Arte Livre, que participam no seu primeiro trabalho profissional independente do curso.
+ Ligaçons relacionadas:
