Mádia-Leva! – O dia 19 de setembro fará-se em Lugo a III Massa Crítica Galega. Do Mádia Leva! animamos-te a participar nela para reivindicar o uso da bicicleta, ofertando alternativas ao emprego massivo do carro particular, especialmente nas cidades.
A Massa Crítica de Lugo foi medrando em número de participantes mês a mês, juntando-se a outras cidades da Galiza e do mundo, que umha vez ao mês, saem a rua a defender umha cidade com menos contaminaçom e ruído. Umha cidade mais saudável.
O carro particular é o símbolo do capitalismo e da sociedade de consumo. Também é o símbolo do individualismo selvagem que caracteriza a sociedade que nos tocou viver. O uso do carro é umha das principais razons da destruiçom do meio natural, das desfeitas na nossa Terra pola construçom de auto-estradas e também o causante de um verdadeiro massacre (só nas estradas galegas houvo 265 no 2007, mais de 3000 pessoas no Estado). É preciso dar alternativas a esta loucura sinistra. Algumhas temo-las muito próximas a todos nós, como é a bíci.
Que é a Massa Crítica?
Trata-se dumha “coincidência organizada” de ciclo-usuárias/os que realizam um passeio colectivo pola cidade. Desta forma pretende-se visibilizar o uso da bicicleta como meio de transporte, animando ao seu uso e reclamando medidas para promocioná-lo.
Porquê galega?
O movimento da Massa Crítica nasceu em Sam Francisco (EUA) em 1992, e desde há anos celebra-se em diferentes cidades galegas. A celebraçom desta Massa Crítica galega com periodicidade anual pretende ajuntar esforços, pôr em contacto às/os diferentes ciclo-usuárias/os, reclamar infra-estruturas de comunicaçom entre as diferentes populaçons, intermodalidade com outros meios de transporte, etc. E também viver umha experiência única coa possibilidade de ligar diversom e reivindicaçom, que é o motor das massas críticas em todo o mundo.
Quando?
A massa crítica decorre em Lugo o sábado 19 de setembro de 2009 às 17h, com saida na Praça Maior. Mas durante todo o dia haverá actividades paralelas, convocando-se às 11:30h também na Praça Maior a todas as pessoas que queiram participar. Também haverá a possibilidade de acudir doutras partes de Galiza, em Corunha organiza-se umha rota para chegar em bici a Lugo, e para quem venha de fora (de jeito organizado ou pola sua conta) haverá um Pavilhom na cidade para dormir.
Resumo de actividades:
11:30h – Praça Maior: Começo de actividades
12:30h – Gasolineira do Minho: Obradoiros
(bicistórias, reparaçom, tuneado, acrobacias)
14:00h – Parque do Minho: Jantar Colectivo
17:00h – Praça Maior: Massa Crítica Galega
20:00h – CS Mádia Leva: Festa !!!
