Conhecim a Carvalho Calero em Ourense, numha conferência que nos deu aos estudantes de Magistério na Escola Universitária de Ourense. Segui a sua figura e para isso botei mao de Martinho Montero Santalha. Estou a falar dos anos 90 do século pasado.
Quando soubem das Letras Galegas do 2020, e com a convocatória da AGAL o 21 de setembro de 2019 em Santiago de Compostela, pensei que podia aportar algo novo ao homenageado. Pensei na sua poesia e pareceu bem a proposta de musicar os seus poemas. Entom achei que Xico Paradelo, membro do grupo Terra Morena, era um bom candidato a interpretar a minha música. Estava no certo. Pedi a Estraviz um livro de poemas de Carvalho Calero, pero nom fum quem de identificar-me com nenhum deles. Passou um tempo. Quando o Paulo Fernández Mirás fez a Antologia de poemas, Xico Paradelo enviou-me 24 poemas de diferentes épocas do autor. Em oito dias musiquei sete deles. Adorei os poemas de Calero. Em algúns deles vim etapas da vida que todos temos que passar. Em outros encontrei metáforas tam próximas, que abraças e é quase umha simbiose natural.
Achei que 7+2 seria um número ideal para achegar ao alunado o poeta, escritor e académico homenageado. Depois desses sete primeiros, colhi da minha música cantigas que puidessem adaptar-se a poemas de Carvalho Calero. Nom procurei muito e encontrei dous. Assim nasceu 7+2 poemas de Carvalho Calero. Logo veu o tempo de armonizaçom e produçom. Feitas as partituras e a prosódia bem ajustada à música, veu o registro na Propriedade Inteletual. A partir de aí começamos os ensaios no meu estúdio particular.
Xico Paradelo foi umha voz excepcional. Destacarei a sua afinaçom excelente e a capacidade que tem de interpretar o que lhe botem. Esta faculdade adquiriu-a a trabalhar com a música do Zeca Afonso. O seu sotaque galego junto o timbre da sua voz fazem dele um companheiro fabuloso.
Este relato ficaria incompleto se nom falasse do amigo Javier Vaz, dono do estúdio de gravaçom em Ourense. Músico dedicado aos demais e professor no IES Blanco Amor de Ourense.
Os nove temas que já se estam a editar em formato MP3 som:
1-Fiestra ao mar, 2-Saudade dunha voz, 3-Enviarei-te esta cançom, 4-Água e carbono, 5-Reticências, 6-María Silêncio, 7-Romeu, 8-Ai, as perguntas e 9-Saudade dum pasado.
A maior satisfaçom é que os nenos e nenas, mozos e mozas, cantem a Carvalho Calero, que o conheçam, e que fagam Terra e País, língua e irmandade. Se logramos esse objectivo, valeu a pena fazer este trabalho.
Ademais da letras dos poemas, disponibilizaram-se as partituras em formato pdf e os arquivos para poder descarregar. Todo no site que está a preparar-se sobre o autor.
Como sempre, dedico estes temas musicais a Aquel que disse: Seja a música, e foi.
