PGL – A Plataforma Queremos Galego, integrada por diversas entidades como a Mesa pola Normalización Lingüística, convocou umha nova manifestaçom para o dia 18 de outubro em defesa da língua galega.
Em conferência de imprensa, Fran Rei destacou o carácter aberto da convocatória, na que se chama a participar ao conjunto da sociedade galega, apontando para «essa imensa maioria de galegas e galegos que querem o seu idioma, que o consideram um dos nossos mais valiosos patrimónios e sinais colectivos, por cima de afiliaçons ou mesmo da língua que empreguem para comunicar-se no dia a dia».
A protesta partirá da Alameda de Santiago de Compostela às 12h00. Os organizadores já anunciárom que até esse dia realizarám diferentes actos por diversas comarcas galegas para animar a gente a participar da reivindicaçom.
Para além do referido, a Plataforma também promocionará, durante os próximos quatro meses, umha ILP (Iniciativa Legislativa Popular) com a que pretendem somar apoios para que a continua vulneraçom dos direitos lingüísticos dos galegos e galegas seja questom discutida no Parlamento galego.
