O “Regueifa Tour” é umha gira que impulsam as “Regueifeiras da Semente” por toda a Galiza. Começou en Vigo, e já passou polo Courel e Vilalba. Ainda irá para Euskal Herria, Viana do Bolo ou Moanha. O 22 de dezembro reuniu em Vila de Cruzes mais de 20 novas regueifeiras adolescentes em umha festa que passará à história.
Em Vila de Cruzes o Regueifa Tour apresentou um programa variado. O evento foi conduzido polas regueifeiras Nuria Penas e Lorena Medela. Participarom a Escola de Regueifa de Carvalho, dirigida pola regueifeira Lupe Blanco, a brindadora do Courel, Tegra Veiga, as Regueifeiras da Escola Semente, umha representaçom de regueifeiras do IES Pintor Colmeiro, de Silheda, e mais as regueifeiras e regueifeiros do IES Marco do Cambalhom, anfitroas desta festa da poesia cantada e improvisada.
Um dos momentos mais espetaculares foi o atranque de generais do Ulha improvisado entre o exército popular galego e o exército francés de Napoleón, a lembrar a batalha de Ponte Ledesma.
Ademais, no Regueifa Tour das Cruzes celebrou-se umha homenagem a Xosé Casal Sueiro, músico e professor, falecido a finais do século XX, compositor do hino de Vila de Cruzes (com letra de Xosé Neira Vilas), e figura popular através do seu personagem Atilano, no programa da TVG Supermartes. Na festa apareceu o próprio Atilano com a sua trompeta num jogo de karaoke.
Como actuaçom especial, participou no Regueifa Tour a charanga Os KokaKola, formada, em grande parte, por alunado do IES Marco do Cambalhom.
O Regueifa Tour procura que as próprias regueifeiras adolescentes organizem e produzam cada espetáculo de forma autónoma, com pessoas colaboradoras de vilas e cidades galegas, bascas e portuguesas. O objetivo do Regueifa Tour é tecer umha rede de adolescentes com a regueifa e o ativismo em defesa da língua galega.
