Depois de ter passado por Vigo e o Courel, esta sexta-feira, dia 17 de novembro, o “Regueifa Tour” chega a Vilalba. O espetáculo começa às 20.00 horas no Auditório Carmen Estévez. Conta com a participaçom das alunas do Obradoiro de Regueifa da Escola Semente e as regueifeiras do IES Basanta Silva. No “Regueifa Tour” de Vilalba será homenageado o músico Manu Chao.
Do IES Basanta Silva de Vilalba as regueifeiras explicam: “Queremos fazer-lhe umha sentida homenagem a um artista que aqui é bem querido, que tem origens familiares no nosso concelho e que também tem umha conexom mui especial com a regueifa”.
Manu Chao será homenageado polas regueifeiras do IES Basanta Silva e do Obradoiro de Regueifa da Escola Semente de Compostela. Muita gente conheceu a regueifa nos concertos de Manu Chao em Lalim e Vila Garcia de Arouça, quando o regueifeiro Pinto de Herbón entrava no final da festa com a melodia do “Ai la lá”. Manu Chao também levou a regueifa a outros concertos, como o mítico de Lyon onde trunfou a pandeireteira Josefa de Bastavales. Foi nesses concertos de Manu Chao quando, por primeira vez na regueifa, se emprega umha peça com um retrouso que canta um público de milhares de pessoas.
O alunado de Vilalba e Compostela enviou ao artista vários vídeos com versões das suas músicas, que se podem ver nas rrss do Regueifa Tour E, durante a festa da regueifa na vindeira sexta, improvisaram sobre melodias do autor de temas como “Clandestino” ou “Última estación, Esperanza”.
Ademais, também participará no espetáculo a Asociación Xermolos de Vilalba, organizadora dos Prêmios de Poesia Terra Chá. Em nome da associaçom que organiza o Festival de Guitiriz, Alfonso Blanco entregará os prémios de regueifa ao colégio Mato Vizoso.
No espetáculo participaram também a regueifeira Lupe Blanco e o regueifeiro Suso de Xornes, com a regueifa de raíz tradicional de Bergantinhos.
