PGL – O PP difunde um documento entre a militância galega como comemoraçom do ‘triunfo dos heróis da mudança’ no qual, sob um epígrafe intitulado ‘Um galego de todos’, asseguram que «o idioma próprio da Galiza deixou de ser um problema com a entrada dos populares ao poder».
No documento, o partido chefiado por Núñez Feijóo destaca a «consulta aos pais», entendida aqui como a «devoluçom de um protagonismo na educaçom a quem nom o deveu perder nunca». Pouco parece importar para o partido governante que esse inquérito carecesse de rigor metodológico, chegando a ser criticado por prestigiados profissionais.
Ainda, do PP salientam o rascunho do decreto que em poucos dias terá texto definitivo e destacam a ideia de ‘bilingüismo’ assegurando que «volveu o consenso» à Galiza e que «se terminou com a imposiçom de umha língua sobre outra», mesmo apesar de que, do ponto de vista jurídico, o galego continua em inferioridade respeito do castelhano, e mália a que o projecto dos populares está no alvo da polémica por, possivelmente, contravir a Lei de normalizaçom.
Esta ideia da ‘imposiçom’ tivo também grande importância na Escola de Formaçom organizada em Alhariz para cargos municipais de todo o País, na qual Núñez Feijóo prognosticou o conflito sobre a língua como um dos eixos de confronto político, também no ámbito local.
«Perante os que tentam impor a sua ideia de País, o PP defende o interesse geral, o contrario é entregar-se às minorias, às minorias da língua e às minorias internas», explicou Feijóo.
