PGL – Quatro novos produtos musicais estám disponíveis na loja Imperdível. Trata-se do recente trabalho ao vivo de Manecas Costa e Narf, o último disco de Projecto Mourente, Kara.o.ke, e os dous discos editados pola banda Galegoz.
A loja Imperdível renova a sua secçom musical com quatro novas propostas sonoras da Galiza. A variedade é a marca desta nova remessa de trabalhos discográficos: fusom músico-cultural ao vivo e música electrónica com a contemporaneidade como ponto comum.
Em “Aló, irmao!” respira-se fusom, nom só da Galiza e a Guiné-Bissau. Galego-português, crioulo, machopi e inglês som as vozes que se deixam ouvir ao longo dos mais de 60 minutos da criaçom. Os sons de raiz africana com a incorporaçom de instrumentaçom própria deste continente, assim como o espírito de Narf, com um cheiro a aventura, farám chegar a força da sua perfeita uniom em formato discográfico.
Com “Kara.o.ke“, Projecto Mourente consolidou-se no cenário musical do País. A um estilo mui característico e reconhecível por parte de Carlos Valcárcel e com a incorporaçom nesse momento da sua irmá Yolanda, há que engadir a voz de Noel Feáns, de Fanny + Alexander, Martin Wu de The Homens, Cable ou Colectivo Oruga. Neste disco inclui-se o tema “Chuliboy”, que resultou finalista no concurso A Polo Ghit, e Projecto Mourente inclui o guitarrista Álex López Sueiras para as actuaçons ao vivo.
“Galician Chimpanzee” e “Revolution Dance” som os dous primeiros trabalhos de Galegoz. A agrupaçom começou como grupo virtual, constituindo-se posteriormente como banda, composta por integrantes de vários dos grupos mais importantes na Galiza.
+ Ligaçons relacionadas:
