O Projeto Boina de Ouro é umha atividade criada polo Clube da Língua do IES Marco do Cambalhom (Vila de Cruzes). O lema, «Moderniza-te, pom boina», quer mostrar a intençom de renovar a imagem tradicional da boina e promovê-la como acessório de vanguarda estética. «Os hipsters estám passados de moda, chegou o tempo dos boiners», assinalam do Clube da Língua.
O propósito desta iniciativa é pôr na moda este acessório tradicional galego e promover o uso da nossa língua nas redes sociais, identificando o nosso idioma com as últimas tendências, a vanguarda e o mundo da moda e da fotografia. O objetivo é criar espaços de relaçom em galego, «vinculando o nosso idioma aos espaços sociais da gente nova», explicam do Clube.
Outro objetivo é promover valores de igualdade e um processo de reflexom para a educaçom nom sexista, «criticando as dinámicas que cousificam as mulheres no mundo da moda». Da organizaçom também indicam que um dos seus objetivos é a promoçom do humor «como ferramenta necessária nos processos educativos, assim como a relaçom do ámbito educativo com outros ámbitos sociais».
Concurso de fotografia
Para atingir tais objetivos, o Clube da Língua convoca um concurso de fotografia que consta de duas categorias:
- Prémio Boina de Ouro. Terá em conta a qualidade, originalidade, criatividade e o valor sociocultural da fotografia.
- Prémio Boina da Simpatia. Tem como objetivo a participaçom das redes sociais com fotografias realizadas espontaneamente para impulsionar a imagem da boina com humor e simpatia.
Haverá um único prémio por categoria, que consistirá numha boina bordada para a ocasiom. O praço para participar no concurso durará todo o outono-inverno.
O júri
O júri do certame estará formado pola empresa de fotografia Bernabé, bem como alunas, alunos, professores e professoras do IES Marco do Cambalhom. Também integrará o júri a zoqueira Elena Ferro —da freguesia de Merça—, em representaçom do mundo da moda. Do Clube asseguram que Ferro «vem demostrando que um calçado tradicional muitas vezes desprestigiado como os zocos pode chegar a ser um calçado na vanguarda da moda europeia. O seu passo polas feiras mais prestigiosas, como a de Milám, demostra que a nossa cultura tradicional tamém pode ser moderna e de última tendência».
Além disto, o projeto vai ter a colaboraçom da página de últimas tendências www.disquecool.com, revista especializada em moda, internet e comunicaçom.
