PGL – A informaçom achegada pola Conselharia de Educaçom e Ordenaçom Universitária como resposta à questom parlamentar apresentada polos deputados Bieito Lobeira e Ana B. Pontón evidencia umha pobre oferta de ensino da língua portuguesa na Galiza.
Durante o curso 2009-2010 só 27 dos 262 centros da Educaçom Secundária Obrigatória (ESO) da Galiza contárom com a língua portuguesa entre a sua proposta educativa, enquanto 8 das 11 Escolas Oficiais de Idiomas o tenhem na sua oferta. Desta maneira, a percentagem de centros públicos que incluírom o português na oferta educativa no presente curso é inferior aos 13%.
A resposta à pergunta formulada polo grupo parlamentar do BNG à Conselharia informa de que se vai «potenciar o ensino das línguas estrangeiras tanto para professorado como para estudantado com o Plano de Plurilingüismo», ademais de continuar «com o projecto de língua e cultura portuguesa em colaboraçom com a Embaixada, em que participam uns 1.000 alunos e alunas»”.
Assim, os planos do departamento dirigido por Jesús Vázquez passam por incrementar a quantidade do ensino do português sob um tratamento de língua estrangeira, no ámbito dos planos do ‘decretaço’ que aprovou o passado 20 de Maio a Junta da Galiza. Nom se especificam quantidades nem planos específicos para a melhora da situaçom nos centros de ensino primário e secundário nem das Escolas Oficiais de Idiomas. O caso destas últimas é paradoxal, pois o português nom se pode estudar nos centros de Viveiro, Ribadeu e Monforte, ao contrário que o inglês, o francês e o alemám, com presença nos 11 centros do país.
