A próxima quinta-feira, dia 26 de outubro, às 20:30h no centro social Gentalha do Pichel (rua Santa Clara, nº21) de Santiago de Compostela, decorrerá a apresentaçom do livro Mover os marcos, a (des)organização do território galego, de Borxa Neira Vilas. No evento participarám, para além do próprio autor, Valerià Paül i Carril, que é geógrafo e professor titular na Faculdade de Geografia e História na USC, e o escritor Paulo Fernandes Mirás, em nome da Através Editora.
A obra, com prólogo de Álvaro Xosé López Mira, analisa como na década de 1990 o Governo galego desenhou um custoso processo de comarcalizaçom que acabou tendo um resultado de escassa incidência real. Hoje, essas comarcas ficaram relegadas num segundo plano. Polo contrário, concelhos, províncias e outras partições administrativas alheias a nós até há dous séculos continuam em plena vigência, gerando umha planta administrativa sobredimensionada. Cumpre movermos os marcos internos que nos delimitam, com o fim de construirmos umha renovada planta territorial galega, baseada em comarcas que sejam o espelho da nossa realidade socioeconómica atual e com o intuito de perdurarem no tempo.
Os políticos movêrom os marcos. Os estudiosos sugerírom movê-los durante muito tempo, de diversas maneiras, a partir de pesquisas sobre o território. E este livro tenta mover os marcos internos, aqueles que delimitam o pensamento da pessoa que nos lê.
Sobre o autor
Borxa Neira (Compostela, 1989) é licenciado em Comunicaçom Audiovisual pola Universidade de Santiago de Compostela. Durante os últimos oito anos desenvolveu-se como profissional na redaçom de conteúdos em diversas empresas de Barcelona, cidade onde mora atualmente. Apaixonado pola geografia desde sempre, Mover os marcos é a sua primeira publicaçom formal neste campo, após umha década de árduas pesquisas. O facto de residir fora da Galiza nom foi impedimento para ele viver umha série de experiências que, por sua vez, lhe permitírom saber mais a respeito da profunda raizame comarcal e paroquial que impregna a Galiza.
