PGL – União Latina lança o vídeo-jogo LIMBO, umha ferramenta informática ludo-didáctica concebida para a aprendizagem cruzada de português e espanhol no Mercado Comum do Sul (MERCOSUL), em que estám Argentina, Brasil, Paraguai, Uruguai e Venezuela (estados-parte); Bolívia, Chile, Peru, Colômbia e Equador (estados associados) e México (estado observador).
Trata-se de um jogo de rol, umha combinaçom de aventuras e estratégias, num labirinto lingüístico, em que para se encontrar a saída é necessário desvendar-se um mistério. A chave deste reside no conhecimento e uso eficiente da outra língua, quer dizer, a outra das duas línguas oferece-se como interface, ajudando assim a ultrapassar as barreiras que o uso do idioma desconhecido poda causar ao leigo. Assim, está considerado polos seus promotores como «contributo apreciável para a promoçom do ensino do espanhol e do português na regiom».
LIMBO destina-se principalmente a crianças e adolescentes, que constituem o público-alvo preferido dos materiais didácticos elaborados pola União Latina, por motivos óbvios de perspectiva de futuro e eficiência; mas também polo simples facto de ser um jogo-vídeo, polo que se prevê que venha a interessar a grupos maiores de adeptos.
Do ponto de vista da formaçom, para além de facilitar a interiorizaçom da noçom de espaço (real e virtual), a interpretaçom de instruçom orais e escritas, a discriminaçom e seleçcom de mensagens, este jogo-vídeo tem umha incidência especial na didáctica da oralidade para ambas as línguas, quer no que di respeito das expressons orais e fraseologia, quer ao nível do léxico. Ao mesmo tempo permite umha familiarizaçom com a utilizaçom das ferramentas modernas que hoje servem para as interacçons e comunicaçons humana em geral.
LIMBO foi pensado para empregar de jeito autónomo, mas também assistido dentro ou fora da instituiçom escolar, com ajuda dum monitor.
+ Ligaçons relacionadas:
