O espetáculo teatral ‘Falar x Falar’, da companhia Volta e Dálle protagoniza a quarta sessom das VI Letras Vivas do Centro Integrado de Formação Profissional (CIFP) Compostela. A funçom vai ter lugar o próximo dia 1 de fevereiro em duas sessões, de manhá às 11:30h e de tarde às 17h, no centro de ensino e conta com a colaboraçom da Mesa pola Normalización Lingüística.
‘Falar x Falar’, protagonizado polos atores Carlos Santiago e Víctor Mosqueira, é umha peça didático-humorística que realiza um percurso pola história da nossa língua a través das experiências de dous bufóns, um da aldeia e outro da cidade, um ‘paleofalante’ e outro, ‘neofalante’. Os romanos, os Reis Católicos ou a cançom protesta sobem ao cenário da sua mao e Santiago e Mosqueira trazem a história até hoje em dia, com umha espetacular proposta de “língua estafada” na Cidade da Cultura.
Letras Vivas
Letras Vivas é um programa que surge no centro de ensino CIFP Compostela e que começou este curso, o passado 1 de dezembro, para comemorar 20 aniversário da manifestaçom que teve lugar na cidade em 2002 por causa do naufrágio do petroleiro Prestige nas costas galegas. A este primeiro evento seguirom-lhe actuaçons musicais coma as d’Os tres pés e agora a funçom de ‘Falar x Falar’. O próximo dia 10 de fevereiro haverá a Mostra do Entroido, umha exposiçom dedicada ao carnaval de Entrimo. para a que se contará com a participaçom de 5 centros de ensino, a própria escola de Entrimo e a Asociaçom do Entroido de Entrimo.
Para estas atividades o CIFP Compostela conta com a colaboraçom da Mesa pola Normalización Lingüística, que estará no centro com umha mesa informativa. A Mesa voltará ao CIFP Compostela no mês de maio, para de novo colaborar nas atividades do instituto arredor do Dia das Letras Galegas.
