O coordenador nacional das Escolas de Ensino Galego Semente, Santiago Quiroga, participou do congresso decorrido no dia 22 de junho em Iruña, junto a representantes de projetos educativos imersivos da Europa.
O auditório baluarte acolheu aos 330 representantes das 114 Ikastolas presentes em Euskal-Herria, ademais de entidades referenciais nos âmbitos político, social e cultural, com o objetivo de refletir sobre os reptos e objetivos do movimento de educaçom popular durante a vindoura década. Ikastolen Elkartea, a entidade que agrupa o conjunto de centros educativos imersivos em língua e cultura bascas, sinala como um fim do evento o de “coesionar o movimento das ikastolas, gerir adesom e ser agentes sociais para construir umha Euskal Herria mais euskaldun, justa e feminista”.
As ikatolas e as Escolas de Ensino Galego Semente som projetos participativos e colectivos sem fins lucrativos, enquadrados na economia social, que estám orientados por valores comuns: galeguidade/euskaldunidade, construçom de País, renovaçom pedagógica, compromisso ecossocial, laicidade, inclusom, diversidade e feminismo. Uns princípios que fôrom unindo a ambos projetos ao longo dos últimos anos em diferentes iniciativas: em 2019, foi assinada umha aliança de colaboraçom; em 2021, foi defendido um quadro legislativo próprio para as duas naçons frente ao centralismo educativo espanhol materializado na LOMLOE e, em 2022, foi organizado um Galeusca pola diversidade linguística e cultural no âmbito educativo junto à Bressola no Museu do Povo Galego, além doutras iniciativas formativas na Galiza e em Hego Euskal Herria.
As ikatolas e as Escolas de Ensino Galego Semente som projetos participativos e colectivos sem fins lucrativos, enquadrados na economia social, que estám orientados por valores comuns: galeguidade/euskaldunidade, construçom de País, renovaçom pedagógica, compromisso ecossocial, laicidade, inclusom, diversidade e feminismo.
No congresso intervírom publicamente, como parte da delegaçom internacional, representantes da Escola Corsa e das Escolas de Ensino Galego Semente. Em representaçom desta última, Santiago Quiroga salientou a importância dos valores educativos democráticos num momento histórico caracterizado polo avanço do neofascismo e a xenofobia na Europa. Frente a intolerância sofrida historicamente polas minorias nacionais, sinalou o coordenador nacional, “é mais importante do que nunca promovermos a auto-organizaçom popular perante as políticas educativas assimilistas, desenhando modelos curriculares e linguísticos próprios, colocando a igualdade de género como umha prioridade educativa transversal e favorecendo os princípios e valores da educaçom para a paz frente aos discursos belicistas que justificam o genocídio do povo palestiniano”.
A presença de escolas populares da Bretanha (Diwan), Occitánia (Calandreta), Catalunha Norte (La Bressola) e Alsácia (ABCM-Zweisprachigkeit), entre outras, demonstra, segundo o coordenador da Semente, que o modelo popular, com finalidade pública, “é a ferramenta mais poderosa que hoje temos como naçons sem Estado para construirmos soberania educativa e, deste modo, garantirmos o direito das futuras geraçons a aprenderem e viverem nas nossas línguas, como expressom da riqueza cultural e epistemológica da humanidade”.
