A Gala decorreu na tarde do sábado no Paço da Cultura de Narom, num ato apresentado por Javi Sánchez e que contou com a actuaçom musical do grupo De Ninghures.
Durante a gala deu-se a conhecer a decisom do jurado, que resolveu seis dos sete galardóns, assim como também o Prémio do Público, que determinou umha votaçom digital na que participaram 5056 pessoas.
Exército Mekemeke ganhou o galardom na categoria de canal de YouTube e Sara Seco levou o galardom ao canal de TikTok. Pola sua parte, Prado Rúa conquistou o Prémio à Criaçom de Conteúdos, Luís do Río recebeu o Prémio à Qualidade Linguística, Rebelico Revista conquistou o Prémio Rede e Galiactiva ganhou o Prémio Revelaçom.
O vídeo A revolución galega de 1846, de Orgullo Galego, logrou o Prémio do Público. Os galardóns contam com umha dotaçom económica total de 7.500 euros, repartidos da seguinte maneira: as categorias Canal de Youtube e Canal de TikTok estám dotados com 1.250 euros, enquanto no resto de categorias as pessoas premiadas levam 1000 euros.
Youtubeiras é umha iniciativa organizada polos serviços de normalizaçom linguística dos concelhos de Ames, Carvalho, Ferrol, Moanha, Narom, Oleiros, Ponte Vedra, Rois, Santiago de Compostela e Teu, das universidades da Corunha, Santiago de Compostela e Vigo e da Deputaçom da Corunha.
O jurado, conformado por Andrea Villa, jornalista; Carlos Callón, professor e escritor; Mónica Valencia, técnica de Normalizaçom Linguística do Concelho de Ourense; Sara Varela, guionista, e Iago Gordillo, realizador audiovisual e ganhador do Prémio Youtubeiras da ediçom anterior, justificarom na acta os resultados:
Exército Mekemeke recebe o prémio na categoria de canal de YouTube “pola cuidada estética utilizada, a qualidade técnica, a periodicidade das publicações e a sua transversalidade”. Sara Seco consegue o prémio na categoria de Canal de TikTok “pola sua constáncia e regularidade, polo seu compromisso em mui diferentes causas (entre elas a da língua) e polo estabelecimento dum “amplo abano de colaborações”. Prado Rúa fai-se com o Prémio à Criaçom de Conteúdos “pola sua versatilidade e pola sua repercussom, assim como polo seu conteúdo, entre o qual destaca o específico para a recuperaçom de palavras galegas”.
O Prémio Revelaçom foi para Galiactiva, canal do que o júri destacou “o uso e a introduçom da língua galega num ámbito em que ainda tem escasa presença, mas de importáncia social crescente, e pola promoçom de hábitos saudáveis”. Luís do Río recebeu o prémio na categoria de Qualidade linguística polo seu “cuidado no uso da língua oral em todos os níveis” e a sua aposta pola “revitalizaçom ou a recuperaçom léxica ao serviço dum meritório didatismo”.
Rebelico Revista conseguiu o prémio na categoria Rede pola “capacidade de convencer ou trasladar umha comunidade real ao mundo virtual” e pola “retroalimentaçom e a expansom mostradas”. O jurado ademais validou o voto emitido pola comunidade, que decidiu entregar-lhe o Prémio do Público ao vídeo A revolución galega de 1846, de Orgullo Galego.
Finalmente, o jurado destacou em termos gerais “a qualidade e a variedade dos canais e propostas apresentadas”. Este ano aspiraram aos Prémios Youtubeiras+ até 89 canais, 49 de YouTube e 40 de TikTok, amais de 41 vídeos.
Javi Sánchez apresentou umha gala na que se repassou e a história de Internet a través de homenagens a diferentes formatos nativos da Rede. Sánchez também fez girar o espetáculo ao redor do lema desta oitava ediçom dos Prémios Youtubeiras+, Fachenda ao cadrado. Precisamente, a fachenda pola trajetória dos galardóns e pola grande atividade desenvolvida pola comunidade criadora de conteúdos em galego convertiu-se num dos leitmotivs da noite.
