PGL – Segundo informaçom recebida pola CIG-Ensino, os coordenadores central e provinciais das Equipas de Normalizaçom e Dinamizaçom Lingüísitica (ENDL) demitírom-se dos seus postos.
Os coordenadores Olga Iglesias, Mercedes Queixas, Carlos Vázquez, Paulino Peña e Iago Castro, deixam o seu posto dous anos antes de ter finalizado o seu período nos seus respectivos cargos.
Das instalaçons educativas em que estavam exibírom a sua preocupaçom ante a saída de umhas pessoas que vinham «desenvolvendo o seu trabalho em prol da nossa língua, propiciando passos adiante e melhoras em diferentes aspectos, e que propiciárom um avanço importante polo seu labor de assessoramento».
CIG-Ensino trasladou de jeito público o reconhecimento ao seu trabalho e a sua solidariedade com eles na toma desta decisom. Do sindicato interpretam que o novo cenário gerado polo derrogamento do Decreto 124 e a publicaçom do Decreto 79 «pudo dificultar o seu trabalho» e que «nom contárom com o apoio suficiente para o desenvolvimento do seu labor».
Ainda, julgam «evidente» que o contexto em que devem realizar o seu labor «mudou de vez», com umha Conselharia da Educaçom que neste momento «só está preocupada por lhe restar presença ao galego» e que fai «impossível» a realizaçom de qualquer trabalho em prol do nosso idioma.
Do mesmo modo, CIG-Ensino pede a demissom do secretário-geral de Política Lingüística, Anxo Lorenzo, pola sua posiçom «anti-galega».
+ Ligaçons relacionadas:
- CIG-Ensino solidariza-se coas coordenadoras e coordenadores provinciais e centrais de Normalizaçom Lingüística [CIG, 17/06/2010]
- Dimiten os coordinadores de Política Lingüística [A Nosa Terra, 17/06/2010]
