Urco Editora, em colaboraçom com a Fundaçom Vicente Risco, Sacauntos Cooperativa Gráfica, Libraría Aira das LEtras, Livraria Traga-Mundos, Pastelería Fina Rei e Restaurante Pingallo, convocam conjuntamente o «I Prémio Antón Risco de Literatura Fantástica». Com esta iniciativa, visam homenagear o escritor e teórico da literatura alaricano Antón Martínez-Risco Fernández. Continuador do gosto polo fantástico de seu pai, Vicente Risco —baste lembrar Do caso que lle aconteceu ao Dr. Alveiros, de 1919—, Antón Risco foi um profundo teorizador da literatura fantástica e ainda autor de numerosas obras do género, muitas delas inéditas.
Ao I Prémio Antom Risco, dotado com 3.000 €, poderá concorrer qualquer texto inédito que se adequar ao género fantástico, sempre que estiver redigido seguindo as normas ILG-RAG, as galego-portuguesas da AGAL ou as normas internacionais do galego. O prazo de envio de originais finaliza a 31 de agosto e a decisom do júri será divulgada a 1 de novembro. Falámos sobre este certame com David Cortiço, da Urco Editora, umha das entidades organizadoras.
David, quando e como surgiu a ideia de criar este certame literário?
Era algo que levávamos buscando desde há um tempo, já que pensamos que umha literatura emergente no nosso país precisava de um prémio que a prestigiasse. Só faltava que a editora apanhar o impulso preciso para afrontar semelhante desafio (e também dar com um colaborador que nos transmitisse confiança e vontade).
Como é a saúde da literatura fantástica na Galiza e no resto dos países de expressom galego-portuguesa?
Na Galiza, que é o âmbito no qual se move o nosso projeto editorial, pesamos que o género está a viver um momento de crescimento importante cara o que supomos será umha normalizaçom (dentro do que se posse chamar normalizaçom no sistema literário galego) de convivência com os demais géneros.
Noutros certames normalmente nom se especifica nada na norma e, quando se fai, polo geral é com a intençom de assinalar que só se aceitam textos em galego oficialista. No entanto, já o ponto primeiro das bases deste prémio explicita que as normas RAG, AGAL e AO som aceites. Por quê?
Por umha questom de base mui importante, dado que consideramos as três normas diferentes do mesmo idioma. Nesse sentido a campanha iniciada no seu dia pola AGAL pareceu-nos de justiça com todas as pessoas que querem participar de processos de criaçom literária e que se vem coutadas na hora de participarem polo que nom deixam de ser meros tecnicismos.
Há outros prémios que explicita ou implicitamente rejeitam trabalhos por seguirem as teses reintegracionistas, inclusive reconhecendo que se trata de obras de grande qualidade. Concibides que se poda renunciar à criatividade por este tipo de critérios?
Consideramos isto duma intolerância mui grave polas mesmas razons que o indicado na pergunta anterior, entendemos que há motivaçons políticas ou económicas detrás destes rejeitamentos que talvez nom cumpre julgar agora mas sim tentar mudar (o que nós fazemos dentro das nossas possibilidades).
A obra ganhadora será premiada com 3.000€ (antes de impostos), umha dotaçom económica muito significativa. Entrais já diretamente na Primeira Divisom dos certames literários?
A quantidade é apreciável e nom teria sido possível sem a colaboraçom dos parceiros. Umha das razons polas quais o premio non estivo antes em marcha também é que nom queríamos entrar de qualquer maneira. Mas além da dotaçom económica eu valoraria também a qualidade das obras a participar ou as bases e pertinência do prémio que acho que é o que pode dar categoria ao mesmo.
Urco começou principalmente traduzindo obras mestras da literatura fantástica, mas pouco a pouco foi diversificando as suas coleçons e incorporando novidades galegas. A convocatória do certame é mais um passo nesta direçom ou obedece a outras razons?
Mais um passo, claro. Como editora que quer crescer temos que ir avançando na consolidaçom do nosso catalogo e também na diversificaçom do mesmo.
+ Ligações relacionadas:
