PGL – A campanha que, durante o último ano, vem desenvolvendo um grupo organizado contra a presença do galego no ensino continua a provocar rechaço em sectores sensibilizados com a precária situaçom social do nosso idioma.
Durante esta semana, o autocarro com que ‘Galicia Bilingüe’ percorre diferentes pontos da Galiza à procura de assinaturas em apoio a um modelo educativo mais espanholizado foi contestado em Compostela, na quinta-feira, e em Ferrol, na sexta.
Na capital da Galiza, o colectivo instalou o seu autocarro na praça de Vigo durante várias horas, pedindo assinaturas às pessoas que passavam polo lugar e “alertando” sobre o que consideram umha excessiva introduçom do nosso idioma no ensino do nosso país.
Simultaneamente, um grupo de várias dúzias de pessoas concentrou-se em frente do veículo, exibindo cartazes em defesa do galego e contra a espanholizaçom em curso, o que foi respondido polos escassos elementos de ‘Galicia Bilingüe’ requerendo a intervençom da polícia.
Finalmente, nom se produzírom incidentes, o que nom impediu o jornal compostelano El Correo Gallego de dar a sua particular versom dos factos, acusando as pessoas concentradas de “radicais” e a sua presença de “boicotagem”. Por seu turno, a porta-voz de ‘Galicia Bilingüe’, Gloria Lago, declarou nas páginas do mesmo jornal, com certo exagero, que “todo o mundo assina”, incluídos “pais, jovens e avós”, contra o que denominou “política impositora” da Junta.
No dia seguinte, sexta-feira, o autocarro chegou a Ferrol, onde as mesmas pessoas que em Compostela pedírom assinaturas a quem passava por umha das praças centrais da cidade. Ali, um grupo de associadas e associados da Fundaçom Artábria concentrou-se com umha faixa que dizia “Na Galiza em galego”, como já tem acontecido noutras cidades do País. A presença policial foi também notória, mas nom se produziu nengum incidente.
No blogue da entidade trasanquesa, assinala-se o apoio dado por um vereador de Izquierda Unida-Esquerda Unida, Miguel Reimúndez, à campanha de ‘Galicia Bilingüe’, chegando a assinar o manifesto. Para além dele, poucas pessoas terám apoiado a iniciativa no tempo que o autocarro estivo estacionado no centro de Ferrol, segundo as mesmas fontes.
+ Notícias relacionadas:
- Artábria opujo-se à presença de ‘Galicia Bilíngüe’ em Ferrol. Fundaçom Artábria, 31 de Outubro de 2008.
- Un grupo de radicales boicotea el autobús de Galicia Bilingüe. El Correo Gallego, 31 de Outubro de 2008.
