Será o próximo 20 de março, quinta-feira, a partir das 16h às 19:30.
A atividade está aberta à participaçom presencial, nas instalações do Conselho da Cultura Galega, no 2º andar do Pazo de Raxoi. Para participar, deve ser feita inscriçom aqui, e também se podem formular propostas nesta caixa, bem em nome de coletivos, bem de forma individual. A jornada também é retransmitida em streaming, e posteriormente permanecem disponível na mediateca web do Consello da Cultura Galega.
Alba Nogueira, jurista e catedrática de direito administrativo, é quem coordena a mesa de debate que fai parte do Foro Participativo “Un país coa súa língua”. Umha iniciativa do Consello da Cultura Galega, facilitada pola cooperativa Rexenerando, que tem como objetivo fomentar o diálogo sobre o futuro da língua.
Sete mesas de trabalho
O projeto “Un país coa súa língua” estrutura-se arredor de sete mesas de trabalho nas que se tratam os desafios do idioma em ámbitos como a educaçom, a administraçom, a economia, os meios, a cultura e a sociedade. A partir deste espaço de troca, redigira-se um documento de propostas concretas, com o objectivo de identificar medidas prioritárias para a normalizaçom do galego no outono de 2025.
A metodologia combina a exposiçom de diversas experiências com a abertura à participaçom cidadá. Cada mesa conta com pessoas com trajeórias diversas que, partindo da situaçom atual, formulam propostas de açom. Todas as achegas som documentadas e sintetizadas por um equipo técnico para garantir um processo rigoroso e transparente.
A mesa sobre educaçom, decorreu o passado 27 de fevereiro
A mesa “Educaçom e socializaçom” abordou o papel do ensino para adquirir a competência e favorecer o uso da língua galega na infância e na adolescência, em relaçom com outras dinámicas e espaços para a socializaçom na língua própria da Galiza. Assim, analizaram-se e debateram-se estrategias e medidas para reforçar o ensino, a motivaçom, o prestígio e a competência linguística. A mesa explorou soluções para favorecer a transmisom intergeracional do galego.
Sanidade, ciência e serviços sociais [23 de abril]
Esta mesa centrara-se em propor ações para garantir a presença do galego na sanidade, nos serviços sociais e na investigaçom científica. Ademais, promovera-se a busca de soluções para melhorar a atençom na língua própria, aumentar os materiais e recursos disponíveis e favorecer a formaçom do pessoal sanitário e assistencial. Também se formularám propostas para reforçar o uso do galego na divulgaçom e na produçom científica, com o objetivo fundamental de obter medidas concretas que garantam o galego como língua de comunicaçom na saúde e na ciência.
Comunicaçom, cultura e açom exterior [27 de maio]
O objetivo desta mesa reside na busca de propostas para reforçar a presença do galego nos meios de comunicaçom, no eido audiovisual e na produçom cultural, em geral. Também abordará novas iniciativas e ideias que potenciem a difusom da língua galega nas plataformas digitais. O foco temático centrara-se em ações concretas para garantir que a língua tenha mais espaços de visibilidade e prestígio, promovendo o seu uso no lazer, na criatividade e na comunicaçom global.
Economia, turismo e desportos [25 de junho]
Esta mesa procura reunir propostas que ativem o uso do galego no comércio, na publicidade, na hotelaria, no turismo ou na comunicaçom empresarial, entre outros ámbitos. Nesta linha, a mesa abrirá o debate às diferentes sugestões sobre as possíveis ações que se podam levar a cabo para potenciar a uso da língua em outras áreas como o deporte, o lazer, a publicidade de grandes marcas galegas, etc.. As achegas devem estar orientadas a iniciativas viáveis que permitam fazer do galego umha ferramenta útil e valorizada nestes setores.
Sociedade, crenças e participaçom comunitária [8 de junho]
Esta mesa constitui-se com a finalidade de obter propostas para o uso do galego na sociedade civil, no associacionismo e nos espaços comunitários. A partir das diferentes achegas expostas, promovera-se a procura de novas ideias para dar pulo à utilizaçom da língua em movimentos sociais, redes de apoio, coletivos culturais e outros contextos como a fé e a tradiçom. O objetivo centrara-se no desenho de ações que promovam o galego como língua de coesom social e participaçom cidadá, garantindo a sua presença em todos os espaços onde a sociedade se organiza como coletividade.
Foro final. [Outubro de 2025]
Para lhe pôr o ramo ao processo, no outono, celebrara-se um foro aberto onde se apresentarám as primeiras conclusões para serem debatidas com o público assistente. Nesta mesa aberta à cidadania serám expostos os principais resultados das demais mesas de debate, oferecendo um espaço para reflexões, propostas e discussões sobre o futuro do galego. Qualquer pessoa interessada pode achegar a sua visom, comentar as conclusões ou sugerir novas linhas de trabalho. As ideias e achegas recolhidas serám documentadas e tidas em conta na síntese final do foro.
