A iniciativa ‘Compostela Literaria’ é uma guia que oferece umha visom panorámica da ligaçom entre a literatura e a cidade. O objetivo principal é dar pistas e sugestões para conhecer essa prolífica relaçom de Santiago de Compostela com a letra impressa.
Inclui um mapa literário que recolhe um longo inventário em construçom permanente de pessoas e obras destacadas, assim livrarias, fundações, bibliotecas e editoras da cidade, para além de oferecer diversos roteiros.
A proposta também conta com umha série de recursos lúdicos, como jogos didáticos ou um escape city, e diversos artigos escritos por pessoas do mundo da literatura, como María do Cebreiro ou Antía Otero. Inclui também umha secçom participativa de Microficcións, à que qualquer pessoa pode enviar as suas próprias criações.
No mesmo site, também há mostras de obras e autoras e autores com relaçom com a capital galega.
Alguns nomes que podem encontrar-se na web som clássicos como os de Rosalía de Castro, Arturo Cuadrado, Concha Castroviejo ou Xoana Torres, ademais de outros mais atuais, como Suso de Toro, Berta Dávila, Daniel Asorey, Marga Tojo ou Patricia Janeiro. Também se recolhem contributos como os de Federico García Lorca, Emilia Pardo Bazán ou Valle-Inclán. E dentro da extensa nómina referida, ficam incluídas propostas de autores e autoras reintegracionistas, do já clássico Ricardo Carvalho Calero, a Raquel Miragaia, Séchu Sende, Teresa Moure ou Vítor Vaqueiro.
