PGL – Diversas associaçons e colectivos da Marinha homenageárom em Burela a poeta Rosalia de Castro no 125 aniversário do seu passamento. O acto, além de procurar a dignificaçom, divulgaçom e posta em valor da obra da escritora, serviu também para reivindicar a reabertura e carácter laico do Panteom de Galegos Ilustres de Sam Domingos de Bonaval, em Compostela.
O escritor e jornalista Miguel Sande, componente da directiva da Associaçom Galega de Escritores e Escritoras em Língua Galega (AELG) nos anos 80 e 90, mostrou a sua surpresa por termos que assistir, em pleno século XXI a actos como este para reivindicar a figura de Rosalia e a reabertura do espaço em que se encontram os seus restos. A tradutora e jornalista Olga Castro, investigadora em temáticas como ideologia na traduçom, linguagem nom sexista e traduçom e teorias feministas, reivindicou a Rosalia mais comprometida com os problemas sociais e de género e deu leitura a distintos textos em prosa da autora. Por último, o artista barreirense Celso Dourado concluiu com um poema do livro Cantares Gallegos, de que formam parte estes conhecidos versos da autora:
Probe Galicia, non debes
chamarte nunca española
Qu’España de ti s’olvida
cando eres ¡ai! tan hermosa.
No acto estivérom representadas as associaçons Francisco Lanza de Riba d’Eu, Ollomao de Barreios, Pomba do Arco de Foz, Buril de Burela, Arrincadeira de Rio Torto, O Milleiro de Ourol, Irmandade San Caetano de Celeiro de Marinhaos, Mardouro do Valadouro, Anduriña de Sam Cibrao, Mariña Patrimonio e o Observatorio da Mariña pola Igualdade. O acto rematou com a interpretaçom dumha peça tradicional e o hino galego por parte da Banda de gaitas Dambara de Burela.
+ Ligaçons relacionadas:
- Associaçons e colectivos da Marinha homenagearom a Rosalía de Castro em Burela [Crónica 3, 14/07/2010]
