A fotógrafa Verónica Ramilo inaugura o próximo sábado 11 de fevereiro às 20.30h no Estudo Garabato Obradoiro de Arte de Carvalho umha exposiçom sobre As mártires de Sofám.
Em junho do passado ano a autora figera o seu trabalho de fim de estudos de fotografia sobre esta revolta popular contra o caciquismo da época, realizando um mural fotográfico com a técnica de arte urbana “paste-up”. Nesta exposiçom mostrará umha reproduçom do mural e vários collages inspirados nos feitos e criados a partir da reutilizaçom das provas de impressom do mural.
Conhecem-se como as mártires de Sofám as quatro labregas abatidas a tiros por agentes de Guarda Civil na paroquia de Sofám, do concelho de Carvalho, o 16 de fevereiro de 1919. A causa do conflito foi que as autoridades tinham clausurado o cemintério paroquial, em novembro de 1918, mas a vizinhança continuou a enterrar clandestinamente os defuntos ali. O domingo 16 de fevereiro de 1919 vai-se dar sepultura a umha criança de quatro anos, mas a Guarda Civil pretende parar a comitiva fúnebre disparando indiscriminadamente contra as pessoas, e para além de várias feridas, resultando assassinadas quatro mulleres: Josefa Bolón Mato, María Caamaño Pallas, Carmen Veira Souto e María Serrano Paz.
