A manifestaçom, que sairá da Alameda de Compostela às 12h, foi convocada a partir da mobilizaçom do passado 17 de novembro, em resposta aos dados linguísticos do IGE, que situam o uso do galego em mínimos históricos.
Com a legenda “língua vital já” os movimentos sociais em defesa do idioma, agrupados na plataforma Queremos Galego, levam meses desenvolvendo umha campanha coordenada territorialmente, e já decorreram plenários em Arçua, Betanços, Boiro, Caldas de Reis, Cangas do Morraço, Carvalho, Compostela, A Corunha, A Estrada, Ferrol, Foz, Lalim, Lugo, Moanha, Ourense, Outes, Pontedeume, Ponte Vedra, Rianjo, Ribadavia, Salvaterra de Minho, Tominho, Vigo e Vila Garcia de Arouça.
A Plataforma Queremos Galego coloca os seguintes pontos mínimos na reivindicaçom:
- 1. Vigência dos objetivos do Plano Geral de Normalizaçom da Língua aprovado por unanimidade em 2004.
- 2. Elaboraçom por parte da Junta da Galiza, Estado e entidades locais, com a participaçom de entidades sociais, dum calendário de açom 2024-2027 para a aplicaçom e atualizaçom de todas as medidas deste Plano, com os recursos necessários (humanos, técnicos, económicos…) para levá-lo a cabo.
- 3. Este calendário contemplará a avaliaçom dos resultados das medidas uma vez aplicadas e as correções que forem precisas.
MEDIDAS URGENTES
Ensino.
Derrogaçom do decreto 79/2010. Aprovaçom dum novo decreto que assegure os máximos níveis de docência em galego em todas as etapas educativas. Garantia imediata de oferta de materiais didáticos em todas as etapas do ensino.
Atividades comerciais e económicas.
Assegurar o pleno direito de uso do galego, com o atendimento e a oferta correspondente, em todo o tipo de serviços.
Cultura e lazer.
Recuperar o papel normalizador da TVG, com ampla oferta para o público infantil e juvenil adaptada a todos os dispositivos e potenciaçom das artes cénicas e musicais em galego e produçom em galego; ações para que se cumpram os mínimos legais de presença de galego na oferta radiofónica e audiovisual e se aumentem as quotas de dobragem, legendagem, e financiamento antecipado de produçom independente. Fortalecer o sistema literário e editorial. Uso do galego em atividades desportivas, de tempo livre e extraescolares.
Administraçom, serviços públicos, saúde e justiça.
Oferta positiva em galego em todos os serviços da administraçom pública, for autonómica, estatal ou municipal e incluindo serviços privatizados dependentes da administraçom pública. Disposiçom de galego em programas informáticos, informaçom, formulários, impressos e no atendimento em todas as suas formas. Conhecimento do galego por todas as pessoas que trabalhem no setor público.
