PGL – A Confederaçom Intersindical Galega (CIG) denuncia a censura de umha publicaçom num colégio por pressons galegófobas, e a atitude dos sindicatos espanhóis aceitando assinar um convénio colectivo redigido só em espanhol.
Quanto ao primeiro dos casos, o sindicato informa de que o director do CEIP Randufe de Tuic ensurou um boletim da Equipa de Normalizaçom Lingüística (ENDL) da escola, retirando-o repetidas vezes do quadro de anúncios.
O caso é no mínimo curioso devido à censura dumha actividade da ENDL por parte dum dos membros da própria equipa. O director do colégio aprovou os conteúdos do boletim, mas umha vez este se pendurou no taboleiro de anúncios, procedeu a retirá-lo.
Segundo a resoluçom que desembocou na medida de retirada, um pai protestou polo conteúdo dumha página em que aparecia umha vinheta extraída da revista Retranca. No desenho aludia-se à política lingüística praticada polo governo de Núñez Feijóo.
A CIG-Ensino procurou um acordo numha reuniom, e finalmente a Junta de Pessoal Docente emitiu umha resoluçom, censurando a actuaçom da direcçom, defendendo a liberdade de cátedra e o direito a amparar a comunidade escolar e exigindo a restituiçom do boletim no seu lugar.
Contra os convénios em espanhol
Por outra parte, a CIG negou-se recentemente assinar o Convénio de Comércio de Materiais da Construçom de Ponte Vedra devido à redacçom em espanhol do corpo do documento.
O desacordo vem pola redacçom do documento final, que foi remitido às partes em espanhol. CIG-Serviços exigiu que o se redigisse em galego, opçom que foi rejeitada pola patronal e os sindicatos CCOO e UGT.
O acordo entre estes dous sindicatos provocará que vaia adiante um convénio que conculca os direitos lingüísticos das trabalhadoras e trabalhadores galegos. Desde a Secretaria Comarcal da CIG-Serviços qualificam de “inaceitável a postura da patronal” e lembram que este tipo de feitos «nom se registram desde a Transiçom Espanhola». A sua responsável comarcal, Maria do Tránsito Fernández, quijo destacar que «incluso se assinam convénios no nosso idioma com organizaçons empresariais de fora do País».
+ Ligações relacionadas:
