PGL – Na manhã de onte, 4 de novembro, às 12:30 horas, tivo lugar umha reuniom entre o Secretário Geral de Relações Exteriores, Júlio César Fernández Mato, e Alexandre Banhos e José Manuel Outeiro, Presidente e Secretário do Conselho da Associaçom Galega da Língua (AGAL), na sede da devandita Secretaria Geral.
Os representantes da AGAL apresentárom a associaçom e as múltiplas linhas de trabalho desenvolvidas nas últimas décadas (congressos internacionais e outros eventos científicos, revista Agália, PGL…), nomeadamente no relativo às relações internacionais e à cooperaçom transfronteiriça, colocando a importáncia de a Galiza estar presente na Comunidade de Países de Língua Portuguesa (CPLP) e de incrementar o relacionamento cos países de língua nacional ou oficial galego-portuguesa.
O Secretário Geral afirmou considerar central para a Galiza a CPLP e o relacionamento cos países membros, à margem de questões normativas, e informou das gestões realizadas polo seu departamento para avançar na presença do nosso país nesse organismo internacional, para o que considerou importante o projecto de novo Estatuto de Autonomia.
Salientou também a importáncia do relacionamento co Brasil, pola sua enorme entidade no citado organismo internacional e o seu crescente papel de liderança política na América do Sul. Igualmente, sublinhou o avanço nas relações co vizinho ao sul através da Comunidade de Trabalho Galiza-Norte de Portugal, as quais deverám intensificar-se no futuro.
Na reuniom fôrom exploradas possibilidades de colaboraçom entre a Secretaria Geral de Relações Exteriores e a Associaçom Galega da Língua, projectando-se a realizaçom dumha segunda reuniom nos próximos meses.
