PGL – Entre os dias 11 e 13 de novembro terá lugar em Ponte Vedra o VI Encontro Internacional de Pandeiros de Mao, DUF, que contará na sua programaçom com actividades tam variadas como concertos, obradoiros e exposiçons. Este ano, o Brasil será o país convidado.
O evento toma o seu nome da palavra de origem árabe que deu lugar a adufe, nome com o que também se denomina o pandeiro. Para a ediçom deste ano, o DUF remarca o carácter internacional do Encontro trazendo como país convidado o Brasil.
A programaçom do evento começa na quarta-feira, dia 11 de novembro, às 18h com o acto Conversa com Carlos Núñez, autor que acaba de publicar o trabalho intitulado Alborada do Brasil e que exercerá como anfitriom do DUF.
Sexta-feira, dia 16, às 16h, a Praça do Teucro acolherá o espectáculo Batuke brasileiro com Bloquinho da Salgueira. Haverá actividades infantis, feira e a já famosa Haima DUF. Com a chegada da noite, às 21h, actuarám no teatro Caixanova os brasileiros Marcos Suzano e Alex Meireles com o galego Canto Donaire.
Já no sábado, dia 14, terá lugar à primeira hora da manhá umha aula magistral de Marcos Suzano e o obradoiro Fai o teu Pandeiro sob a tutela do mestre artesám Carlos do Viso.
Às 12h, terá lugar o espectáculo Ao encontro de… Renato Spencer. Já na tarde, polas 16h, haverá umha exibiçom de capoeira. As actividades fecharám após a celebraçom do tradicional Serao urbano, que começará por volta das 20h na Praça do Teucro.
