PGL – Os partidos de âmbito estatal PP e PSOE unírom os seus votos no Pleno da Câmara da Corunha para rejeitar umha iniciativa do BNG em favor da promoçom do uso do galego na Administraçom local.
A moçom do BNG tem três pontos. No primeiro insta-se à Câmara municipal a utilizar, promover e normalizar a língua galega em todos os âmbitos, de acordo com a legislaçom vigente e num momento no que se pretende umha involuçom nesta normalizaçom. No segundo, convidava-se ao Governo municipal a que tramita-se umha ordenança para regular o impulso do galego no concelho. No terceiro e último, estabelecia-se que esta ordenança teria de ser dada a conhecer a todos os grupos municipais para chegarem a um acordo.
Na exposiçom de motivos desta iniciativa, lembrou-se que «de acordo com a legislaçom vigente, os concelhos galegos tenhem a obriga de utilizar e promover a língua galega» e salientou-se que «a principal manifestaçom da identidade cultural de um povo é a sua língua».
O BNG contextualiza a moçom em um momento especialmente delicado para a nossa língua dada a “involuçom” que se tem registado «desde a chegada do PP ao Governo da Junta a respeito da promoçom e normalizaçom da língua». Nesta linha, a formaçom nacionalista assinalou que o Parlamento galego aprovou por unanimidade, em 22 de Setembro de 2004, o Plano de Normalizaçom Lingüística que prescreve textualmente a necessidade de «consolidar o papel normalizador das corporaçons locais e das deputaçons por meio da generalizaçom do uso do galego como principal língua de trabalho e comunicacçom com os seus administrados».
