PGL – Na reuniom ordinária do Plenário da Comissom Lingüística da AGAL realizada em Santiago de Compostela no passado dia 31 de Janeiro, assumiu formalmente a condiçom de membro da Comissom o Prof. Valentim Rodrigues Fagim, e foi eleito novo membro o Prof. Fernando Vasques Corredoira, com o que o número actual de membros da Comissom Lingüística ascende a treze.
Fernando Vasques Corredoira é professor de português, tradutor e autor de ensaios e investigaçons sobre a língua, entre os quais A Construção da Língua Portuguesa frente ao Castelhano. O Galego como Exemplo A Contrario (Laiovento, 1998) e a série de esclarecimentos lingüísticos Falar com Jeito do PGL.
Na mesma sessom, a Comissom Lingüística da AGAL resolveu dar à estampa umha colectánea de trabalhos sobre a língua que, sob o título Leituras da Língua de Aquém e de Além. Por um Galego Extenso e Útil, reúne doze artigos de membros da Comissom que fôrom publicados com anterioridade em diversos meios e que iluminam aspectos gerais e específicos do corpus e do status do galego-português da Galiza.
Por último, na sessom de 31 de Janeiro, a Comissom Lingüística adoptou, em relaçom à oficializaçom em Portugal do Acordo Ortográfico da Língua Portuguesa de 1990, o posicionamento que se plasma no Comunicado da Comissom que aqui reproduz o Portal Galego da Língua.
