PGL – Neste ano 2010 cumpre-se o 125 aniversário da morte de Rosalia, e o primeiro centenário dos nascimentos de Ricardo Carvalho Calero e Luís Seoane. Ainda, Uxio Novoneira será o autor homenageado no Dia das Letras Galegas. Por estas razons, a AS-PG realizará neste ano umha série de iniciativas tendentes a divulgar e popularizar a obra destes autores e autora.
A primeira iniciativa será a nova ediçom do concurso Procurando poema e poeta. O concurso consiste em recompor um texto cujas palavras estám desordenadas e a partir daí, mediante um sistema de pistas, intentar averiguar quem foi o autor ou autora que o escreveu.
Durante os meses de Fevereiro, Março, Abril e Maio, a AS-PG apresentará um textos de um dos autores citados combinado com outros dous textos de poetas contemporâneos.
Haverá quatro provas consistentes em recompor os textos sabendo que um destes será de Rosalia, Carvalho, Seoane ou Novoneira e que os outros dous que aparecerám misturados serám de outros dous autores ou autoras.
Para quem conseguir recompor todos os textos (as quatro probas) haverá um prémio de 350 euros, 450 se a pessoa for sócio ou sócia da Associaçom Sócio-Pedagógica da Língua.
Poderám participar também no concurso, para além de pessoas a título individual, as Equipas de Normalizaçom e Dinamizaçom Lingüística (ENDL) dos centros escolares. Neste caso a pessoa responsável da equipa realizará a inscriçom indicando que é em nome do grupo.
