PGL – No sábado dia 5 de dezembro terá lugar na Corunha umha reuniom para constituir umha associaçom que possibilite a criaçom de umha rede de escolas populares nas que a língua franca seja o galego, autónomas e nom sujeitas a compromissos politicos.
Desde abril de 2009 existe um movimento de apoio efectivo ao ensino em galego, um movimento que com o nome Galiza co Galego, pretende que se poda exercer o direito ao ensino em galego na Galiza, constituído por pessoas que nom querem que os poderes públicos, ou as decisons dos partidos políticos, ou médios de pressom concedam um direito que já nos é inato, como o uso e aprendizagem da nossa língua.
Contando nos dias de hoje com mais de 750 apoios, para poder fazer possível a ideia de Galiza co Galego e lograr o apoio social e económico para a Rede Popular de Ensino em Galego, a Comissom Gestora achou necessário constituir-se como associaçom.
Se contar com 3.000 pessoas associadas e umha quota anual de 100 euros por pessoa, a associaçom teria a capacidade de promover a criaçom dumha rede popular de ensino em galego, apoiando economicamente os projectos educativos que cumpram os objectivos marcados polo colectivo.
Para chegar a este objectivo, o sábado 5 de dezembro, às 18h30, o Centro Cívico Municipal do Castrilhom, sito na praça Pablo Iglesias (Corunha), acolherá o acto fundacional da “Comissom promotora de ensino Galiza co Galego”.
Por um ensino laico, de qualidade, pluralista e democrático, ao serviço da sociedade e independente das decisons políticas, estám convidadas a participar no acto todas aquelas pessoas que defendam a língua e o ensino em galego.
+ Ligaçons relacionadas:
