PGL – A Associaçom de Escritores em Língua Galega vem de publicar umha nova secçom no seu web sobre Literatura de Tradiçom Oral, onde poderemos observar vídeos gravados durante as “Polafias“, encontros organizados pola Associaçom sob o objectivo dar a conhecer esta literatura na voz de informantes até agora anónimos/as.
As polafias som veladas de carácter festivo com contidos literários e musicais que a Associaçom de Escritores en Língua Galega (AELG) celebra e difundirá a través do web e que terám umha duração aproximada de 90 minutos. O projecto da AELG é coordenado polo Vogal de Literatura de Tradiçom Oral, Antonio Reigosa, e conta com a colaboraçom de diversas associaçons e instituiçons.
A palavra polafía é um neologismo referido às reunions ou veladas de carácter festivo com contidos literários e musicais, e tem como objectivo primordial o de ponher em valor e resgatar do esquecimento o valioso património oral, literário e musical, galego. Assim, os organizadores explicam que o termo polafía quer reunir no seu significado o melhor dos diferentes matizes e acepçons de velhas palavras (polavilas, fías, fiadas, fiandons, serans,…) com semelhantes contidos. A principal diferença, quanto ao desenvolvimento, daquelas reunions de antigo com o desta nova proposta é que agora, mercê ao avanço das novas tecnologias, temos a possibilidade de compilar esses encontros, favorecendo o arquivo e estudo do recompilado, assim como a difundir esse património.
Já quanto à realizaçom física do evento, a polafía requer da presença dum divulgador ou especialista que introduzirá e comentará as principais características das peças e géneros literários tratados, dum recitador de poesia anónima ou de autor de feitio popular; dum músico, que interpretará romances, coplas ou cantares de raiceiras tradicionais. Porém, o elemento humano transcendental e imprescindível no desenvolvimento de cada polafia constituíram-no os homens e mulheres, narradores, cantadores, romanceadores etc, vizinhas e vizinhos de cada lugar onde se desenvolva a polafia, que actuaram como protagonistas, difusores dum rico saber.
Polafia recolhida em Cercedo
