PGL – Perante a drástica reduçom dos orçamentos para a defesa e promoçom da língua galega por parte do actual governo da Junta, o professorado do corpo de avaliaçom Celga acaba de criar um blogue desde o que reivindicarám os seus direitos.
A assembleia do professorado é um colectivo de professores/as e avaliadores/as do Certificado de Língua Galega que quer conseguir um status profissional digno de acorde com o trabalho que desenvolvem. Para isto, valem-se do blogue criado ex-professo, para fazer ouvir a sua voz, reclamando todos os direitos que deve ter a docência e avaliaçom dos referidos Celga.
Os integrantes aspiram a conseguir diferentes medidas que suporiam a dignificaçom completa do seu trabalho, entre as que destacam a criaçom dum corpo de docentes estável e profissionalizado de acordo com os critérios de igualdade, mérito e capacidade.
Oferecemos a seguir as petiçons do colectivo:
Reivindicaçons laborais:
– Contrato laboral (com todo o que isto implica: cotizaçom, seguro…) tanto para o professorado como para o corpo de avaliadores.
– Exigência dumha formaçom profissional acorde com o trabalho que se desenvolve (Filologia Hispánica –subsecçom de galego-, Filologia Galego-Portuguesa, Filologia Galega, Grado de Língua e Literatura Galega, Hispánica –com Avançado da Escola Oficial de Idiomas) controlo da qualidade e do rigor profissional e unificaçom de critérios para alcançar os objectivos e conteúdos programados para cada curso.
– Remuneraçons e orçamento para o pagamento de possíveis deslocamentos e do material extra necessário usado ao ministrar aulas.
– Listagens separadas para o professorado de Celga, linguagem jurídica e administrativa e avaliaçom. Estas listagens devem ser claras, ao modo das que há para o corpo de Ensino público da Conselharia de Educaçom e Ordenaçom Universitária.
– Pagamento do trabalho de avaliaçom de Celga como o que é: horas extras para unha pessoa que nom trabalha para a empresa (neste caso, a Junta) que a contrata.
– Contrataçom das pessoas às que realmente lhes suponha unha “melhora de emprego” este tipo de trabalho.
– Possibilidade de que o corpo de professores de Celga podam inscrever-se nos cursos de linguagem administrativa e jurídica para poder completar a sua própria formaçom.
– Uso de aulas dotadas de recursos tecnológicos para conseguir um ensino-aprendizagem de qualidade.
Reivindicaçons para a melhora do sistema de cursos:
– Criaçom de mais cursos, dedicados à formaçom dos diferentes corpos profissionais existentes (jornalístico, professorado, científico…) e para a sociedade em geral (alfabetizaçom).
– Ampliaçom da duraçom dos cursos adequando-se a um tempo real que um adulto precisa para aprender bem umha língua.
– Provas para que nos níveis se ministrem aulas a um alunado que se corresponda com o referido nível..
– Máximo de 20 alunos por grupo.
– Provas de diagnóstico que reconduzam ao aluno ao nível que lhe corresponde.
– Fim da mistura de alunado de diferentes níveis.
+ Ligaçons relacionadas:
