PGL – A Mesa pola Normalizaçom Lingüística ou o Movimento polos direitos civis, entre outros colectivos, solicitam a demissom de Benigno López devido às suas freqüentes manifestaçons de fobia para com a língua galega.
O MpDC critica duramente a postura tomada polo Valedor perante a realidade lingüística que nos atinge. Assim, explicam que «um cargo como o do Valedor nom pode difundir ideias políticas, senom olhar polos interesses da cidadania, por defender o que é de lei. Como pode aludir a que a defensa do galego iria contra a constituiçom?»
Por sua banda, da Mesa pola Normalización Lingüística lamentam a «perda de prestígio e de representatividade» da instituiçom do Valedor do Povo com Benigno López, cujo mandato se está a caracterizar por unha «fobia obsessiva contra a língua galega, que acarreta já dos seus tempos de magistrado, quando se negava a utilizar o topónimo A Corunha».
Na mesma linha do anterior, a organizaçom considera «deplorável» que em sede parlamentar Benigno López «perde-se as formas e mantivesse umha atitude “chulesca”, improcedente e irresponsável, vinculando defesa do galego com violência, mentindo sobre as queixas que se lhe achegárom da Mesa e realizando um discurso descaradamente partidista».
«Parecia mais porta-voz do PP que o próprio porta-voz do PP», lamentam.
