PGL – O Ministério de Ciência e Inovaçom da Espanha emprega o topónimo ilegal El Ferrol del Caudillo nas suas comunicaçons com o Vice-reitorado da cidade naval.
Francisco Jorquera, porta-voz do Bloco Nacionalista Galego no Congresso dos Deputados registou umha iniciativa na Câmara espanhola para pedir explicaçons ao departamento dirigido por Cristina Garmendia.
Jorquera pergunta «como é possível que a estas alturas o Ministério utilice umha denominaçom toponímica alcunhada polo regime ditatorial de Franco», e insiste em que se trata de umha «grave vulneraçom do topónimo oficial e legítimo da cidade» e que «já som muitas as ocasions em que o BNG se dirige ao Governo central pola constante vulneraçom da toponímia oficial da Galiza».
O porta-voz nacionalista vai além e assegura que neste caso se «superárom todo tipo de limites» ao empregar, após mais de três décadas de democracia, umha denominaçom toponímica «criada polo regime franquista para salientar a procedência do ditador».
Por todo isto, Jorquera exige-lhe ao Governo espanhol a adopçom de medidas para «corrigir urgentemente este tipo de atitudes», e assinala que «além de questons lingüísticas e do respeito que a administraçom do Estado deve ter à toponímia oficial da Galiza, deveria ter em conta as conotaçons ideológico-políticas que possui a utilizaçom desta forma ilegal e deturpada».
+ Ligaçons relacionadas:
-
‘Ferrol del Caudillo’ en textos do Goberno central [A Nosa Terra, 04/07/2010]
