PGL – Hoje, terça-feira dia 22 de dezembro às 20h30, o Centro Social Mádia Leva!, de Lugo, oferecerá umha palestra-colóquio intitulada Mitos e ritos do Natal, proferida polo escritor e mitólogo lucense Antonio Reigosa.
Nesta linha de recuperaçom das nossas tradiçons natalícias, o Mádia Leva! organizará mais um ano a chegada do Apalpador a Lugo. Às 18h estará no centro social do colectivo. A seguir, a mais popular personagem do natal galego percorrerá as ruas da cidade.
Do Mádia Leva apontam que, na actualidade, o Natal é, por cima de tudo, umha festa consumista com o Pai Natal como símbolo globalizado. É por isto que a associaçom quer achegar-se ao Natal tradicional do nosso país.
Biografia de A. Reigosa:
Antonio Reigosa trabalha no Departamento de Didáctica do Museo Provincial de Lugo desde 1982. É escritor, conferenciante, investigador da mitologia e da literatura oral galega, colabora com trabalhos de divulgaçom relacionados coa história, a arte, a etnografia, a mitologia popular e a literatura oral en diversos meios de comunicaçom e revistas especializadas.
Co-fundador de “Chaira”, Grupo de Investigaçom Etnográfica (Lugo 1992), com campanhas de recolhida de literatura oral em distintos concelhos da provincia de Lugo. Ponente en numerosas jornadas e congressos. Participa em campanhas de promoçom da leitura nos centros de ensino, bibliotecas e associaçons culturais.
Criador e coordenador de contéudos da Enciclopedia Virtual da Fantasía popular de Galicia denominada Galicia Encantada.
Coordenador da revista oral de periodicidade trimestral O pazo das musas, editada polo Museo Provincial de Lugo desde 2004.
Recebeu, entre outros, os seguintes premios: Certame Nacional de Artes e Tradicións populares do Ministerio de Cultura (1987), o Facho (1989), o Premio Merlín (1998), Premio Supernova (1999), Premio Raíña Lupa (2000), Lucense do Ano (2002), Premio Frei Martín Sarmiento (2005); e foi finalista do Premio Nacional de Literatura Infantil o ano 1999 com Memorias dun raposo, e do Premio Pura e Dora Vázquez de Creación Literaria o ano 2004 com Pesadelos.
+ Ligaçons relacionadas:
