PGL – Mais um ano, o Portal Galego da Língua achegou um modesto contributo para a recuperaçom do Dia da Mentira, tradiçom comum a outros países lusófonos e nom só. Como adivinhárom os nossos leitores nos foros, a mentira deste ano foi a notícia da suspensom do Decretaço contra o galego.
A nossa primeira achega foi em 2003, quando publicámos o estudo de umha proposta alternativa ao reintegracionismo. Em 2004 a mais de umha pessoa saltou-lhe o coraçom do peito quando leu que mercê a um acordo AGAL-RAG, o professor Estraviz converteria-se em novo académico desta última. Um ano depois, e ainda fresca a reforma da normativa isolacionista, noticiámos um suposto acordo para a adopçom do binormativismo na Galiza, de forma a alcançar umha certa pax normativa.
Já em 2006 volvêrom saltar os coraçons com umha informaçom bombástica: a AGAL poderia vender o PGL a um importante grupo de comunicaçom. Tratou-se, felizmente, de um engano, como o publicado em 2007 sobre a fusão do Portal com o sítio web da Mesa pola Normalizaçom.
Como em 2010, nos dous últimos anos atendêmos a factos de actualidade para nos inspirarmos. Em janeiro de 2008 a RAG aceitou a inclusom do termo greleiro no seu dicionário a pedido de uma importante empresa galega. Do PGL recolhêmos essa especial sensibilidade académica para insinuar que após uma revolta no IKEA de Matosinhos, a RAG poderia aderir ao Acordo Ortográfico. Também a actualidade nos inspirou no ano a seguir para noticiar que um personagem galegófobo poderia entrar no governo do recentemente eleito presidente Feijóo.
Nom fomos os únicos
Nom foi o PGL o único portal da internet a lembrar o Dia da Mentira, mesmo apesar de este ano coincidir em datas festivas. Mais um ano, o diário digital Vieiros somou-se à iniciativa de recuperaçom e informou de que a Galiza poderia ter em breve o seu próprio colisionador de hadrons. Por sua parte, a formaçom política Primeira Linha surpreendeu anunciando um debate entre Gloria Lago, Méndez Ferrín e Maurício Castro.
+ Ligaçons relacionadas:
- Galiza terá o seu propio colisor de Partículas [Vieiros, 01/04/2010]
- Gloria Lago, Maurício Castro e Xosé Luis Mendez Ferrin debatirám sobre o futuro do galego nas XIV JIG [web de Primeira Linha, 01/04/2010]
- O decreto da lingua, no Día das Mentiras [Xornal de Galicia, 02/04/2010]
+ Notícias publicadas polo PGL no Dia da Mentira:
- A Junta poderia anunciar em breve a suspensom do Decretaço [2010]
- Feijóo criará a Direcçom Geral de Igualdade Cidadá, com Pousada como assessor [2009]
- RAG estuda possibilidade de se incorporar ao acordo lusófono após revolta no IKEA [2008]
- Possível fusom do PGL e o portal da Mesa [2007]
- PGL na corda bamba [2006]
- Junta da Galiza aposta polo bi-normativismo para o galego [2005]
- Isaac Alonso Estraviz entrará na RAG fruto de um acordo entre a AGAL e a Real Academia Galega [2004]
- Umha proposta alternativa ao Reintegracionismo? [2003]
