PGL – A organizaçom da Quinzena de Realizadores do Festival de Cannes acaba de fazer pública a listagem de filmes seleccionados na ediçom de 2010, que decorrerá entre os dias 13 e 23 de Maio. O filme do director galego Oliver Laxe, ‘Todos vós sodes capitáns’, forma parte da programaçom desta prestigiosa secçom.
Em quatro décadas de história, o festival descobriu os primeiros trabalhos de cineastas como Werner Herzog, Rainer Werner Fassbinder, Nagisa Oshima, Martin Scorsese, Jim Jarmusch, Michael Haneke, Chantal Akerman ou Spike Lee, e acolheu a obra de grandes nomes como Robert Bresson, Manoel de Oliveira, Philippe Garrel, Francis Ford Coppola ou Pedro Costa.
Filho de emigrantes galegos, Oliver Laxe nasceu em Paris no ano 1982. Quando a criança conta os seis anos, a sua família retorna com ele para a Corunha, instalando-se no herculino bairro da Gaiteira. Depois de estudar cinema e realizaçom em Barcelona (Universidade Pompeu Fabra), realizou, em 2006, umha curta-metragem em 16mm, projectada no Festival Internacional de Cinema de Gijom e ganhadora do Prémio Internacional do Festival de Cinema Experimental de Granada e do Prémio INJUVE 2007. Desde esse ano reside no Tânger, Marrocos. Desta experiência é que nasceu o filme agora selecionado em Cannes.
Sinopse do filme
Um cineasta novo e europeu realiza um filme com menores acolhidos num centro no Tânger, Marrocos. Durante a rodagem, os heterodoxos métodos de trabalho do director desgastarám a sua relaçom com os próprios nenos, até o ponto de transformar por completo o desenvolvimento do projecto.
