PGL – Depois de converter o galego num problema devido a interesses eleitorais, a cúpula do PP tira de contactos para dar soluçom a um dos seus maiores quebra-cabeças: umha pessoa para chefiar o departamento de Política Lingüística. A intençom do partido é a de nomear alguém antes da celebraçom do Dia das Letras.
O PP está divido na procura de um ou umha responsável para o cargo. De umha banda o conselheiro de Educaçom, Jesús Vázquez, de quem depende o departamento, aposta por alguém de dentro do partido que leve até o fim as promessas da derrogaçom da lei actual. Da outra, Pedro Puy, sobrinho do ex presidente Fraga, quem na procura de consenso aconselhou Feijóo contratar um profissional «de prestígio».
Segundo informaçons que aparecêrom na imprensa, para o posto já teriam sido consultados nomes como Felipe Ferreiro (ex delegado de Cultura e Educaçom em Ourense), González Moreiras (director geral de Política Lingüística durante o mandato de Celso Currás em Lugo), Anxo Lorenzo (professor de Traduçom e Lingüística da Universidade de Vigo) ou Mauro Fernández (catedrático na Universidade da Corunha), quem nom tenciona assumir o cargo, pois após a última campanha eleitoral do partido, o posto semelha pouco atractivo para quem realmente conte com prestigio na defesa do galego.
Também se fala das professoras Mercedes Brea (catedrática de filologia Românica da Universidade de Santiago), Elvira Fidalgo (Doutora no mesmo departamento que a anterior) ou Rosa M. Martín Biedma (funcionária do Centro Ramom Pinheiro para a Investigaçom em Humanidades).
A demora na escolha de responsável vem propiciada por reservas ideológicas e políticas. Daí, a procura de um candidato ou candidata «de consenso» que tape as primeiras brechas que aparecem no interior do partido após recuperarem a chefia da Junta.
