PGL – O programa deste ano inclui espectáculos de clown e escapismo, música galega e brasileira e, como é costume no festival, o espírito das romarias tradicionais galegas.
A primeira das jornadas do festival, começa na noite do 21, por volta das 21:00 horas cumha ceia a preços populares. A seguir a refeiçom, haverá tempo para um concerto em que o protagonista será a lusofonia, que terá presença da mao de Renato Spencer & Café Caxaça, banda galego-brasileira afincada em Vigo. Na jornada, tocarám também outras bandas emergentes da Galiza.
Já na jornada do sábado dia 22, a essência das romarias populares chegará com as merendas, quando famílias e grupos de amigos se juntam para comer no monte, perto da capela de Santo Caetano
Aproveitando as merendas, terá lugar a XIV ediçom do concurso de tortilha com prémios à de melhor sabor, à mais inovadora, à melhor apresentada e à mais grande.
A comissom elaborará umha tortilha gigante de mais de um metro de diâmetro e 10 centímetros de largura, que ficará fora de concurso.
Para a elaboraçom da tortilha gigante, os cozinheiros e cozinheiras precisarám 35 quilos de pataca, 14 dúzias de ovos, 5 quilos de cebolas, 5 quilos de pimentos, além de toucinho e chouriço. A tortilha, fora de concurso, será repartida gratuitamente entre os assistentes à merenda. Na hora dos tradicionais jogos populares, Natalia Outeiro, umha das mais destacadas representantes do Novo Circo galego, realizará umha sessom de escapismo para desfrute de grandes e pequenos.
A seguir a merenda, com a chegada da noite, o grupo folque de música tradicional Os Minhotos e as orquestras Colores e Blanca Doble, serám os encarregados de pôr a música. Para fechar o festival ademais do tradicional baile do ‘farolilho’ haverá também umha grande chocolatada para os assistentes.
Para além do indicado, o festival apresentará o trabalho de restauraçom de um retábulo do século XVII, umha das jóias do barroco da comarca. As labores de recuperaçom, impulsionadas pola asociaçom vizinhal e cultural Irmandade Santo Caetano, durárom todo um ano e a abertura para a visita ao público, coincidirá com a missa solene na capela que terá lugar no segundo dia do festival, sábado 22 por volta das 13:00 horas.
O próximo objectivo da associaçom é a recuperaçom da capela, também do século XVII, umha vez que a Audiência Provincial de Lugo outorgou novamente a titularidade aos vizinhos.
