PGL – O pleno do Conselho Escolar da Galiza rejeitou por maioria o anteprojecto de decreto do galego no ensino nom universitário proposto pola Junta, pois aprovárom-se emendas à totalidade que tivérom 24 votos a favor e 16.
Desta maneira, ficárom sós na defesa do documento original os representantes da Administraçom, dos empresários e dos colégios públicos e privados. Cumpre assinalar que dos 16 apoios que tivo o anteprojecto, 6 eram de representantes da própria Conselharia, 2 eram presidentes de câmaras em que governa o PP, 2 da Confederaçom de Empresários, 2 responsáveis de centros privados e concertados, 2 representantes «de reconhecido prestígio» nomeados directamente pola Junta e 2 da CONGAPA (Pais e Maes de Ensino Privado e Concertado).
Reacçom de CCOO
Do sindicato lamentam que no próprio Conselho a Administraçom Educativa afirmasse que nom ia ter em conta o resultado desta votaçom e chamam a Conselharia de Educaçom a escuitar o Conselho que representa toda a comunidade educativa da Galiza.
Reacçom da CIG-Ensino
Para a CIG-Ensino é especialmente «lamentável» a atitude «autoritária e de desprezo» de Anxo Lorenzo, quem constatou «o seu absoluto desprezo para este órgao ao afirmar que nom estava disposto a assumir o acordo aprovado».
Anxo Louzao, secretário nacional da CIG-Ensino, explicou que esta proposta de decreto implica um retrocesso e um ataque ao nosso idioma. Ainda, afirmou que está baseado na mentira e na ausência de um mínimo consenso, com a única pretensom de «exterminar o galego do uso social e reduzi-lo no ámbito educativo».
Reacçom do STEG
Do STEG, que nom forma parte do Conselho Escolar, celebram o êxito da comunidade educativa agradecendo a resposta quanto à mobilizaçom contra o decreto. Nesta linha, explicam que a Conselharia tem agora um importante desafio, «atender as demandas da comunidade educativa e retirar o rascunho do decreto».
Ainda, o sindicato solicitou formalmente a demissom do secretário-geral de Política Lingüística depois de analisar a sua gestom no ano que leva exercendo o cargo.
