PGL – O Conselho da Associaçom Galega da Língua (AGAL) rejeita a repetiçom do juízo contra Carlos Callón por instar o ex-juiz decano da Corunha a cumprir a legalidade. O presidente da AGAL, Miguel R. Penas, critica esta «insólita situaçom», e lembra que no anterior julgamento nem a fiscalia nem a juíza instrutora viram indícios de delito por parte do presidente da Mesa pola Normalización Lingüística.
Para o presidente da AGAL, Miguel R. Penas, «algo falha quando a justiça se dedica a julgar os que defendem o cumprimento da legalidade», e acrescenta que «situações como esta alimentam a crença de que a justiça nom é igual para todas as pessoas».
O motivo do julgamento contra Carlos Callón é ter criticado, em 2008, o uso de toponímia deturpada por parte da pessoa que na altura era juiz decano da Corunha, Antonio Fraga Mandián. A partir daí iniciou-se um longo processo judicial com múltiplos episódios que culminou com o juízo de novembro de 2012 e parecia ter finalizado com a sentença absolutória conhecida em janeiro deste ano.
Por esta razom, o Conselho da associaçom manifesta o seu apoio a Carlos Callón e deseja que a sentença seja pública o antes possível e, mais umha vez, em sentido favorável ao acusado. «Umha resoluçom deste caso em sentido contrário», afirma Penas, «seria negativa tanto para imagem da justiça como para todo o movimento de defesa da nossa língua».
Do Conselho da AGAL também apelam às autoridades políticas e judiciais para que «deixem de ver a nossa língua como um problema e comecem a participar das estratégias que promove a sociedade civil para procurar o aproveitamento das oportunidades que nos dá». A língua galega «é um bem de toda a cidadania e um forte elemento de unidade da nossa coletividade», insiste Penas, razom pola qual rejeita as tentativas de instrumentalizar o galego para dividir a sociedade.
Frente à divisom, o Conselho da AGAL aposta no galego como «fator multiplicador do bem-estar da cidadania galega», para o qual «cumpre aproveitar as oportunidades que nos abre a Lusofonia».
+ Ligações relacionadas:
- Carlos Callón, absolvido de supostas injúrias ao ex-juiz decano da Corunha [PGL, 09/01/2013]
- O Conselho da AGAL solidariza-se com o presidente da Mesa ante o iminente juízo [PGL, 29/112012]
- Callón será finalmente julgado a dia 10 pola denúncia de Fraga Mandián [PGL, 05/02/2012]
- Justiça arquiva denúncia do juiz Fraga Mandián contra Carlos Callón [PGL, 25/07/2011]
- Callón negou-se a declarar por nom ter recebido as notificaçons em galego [PGL, 17/12/2010]
- Julgam o presidente da Mesa por criticar um juiz que usou a forma ‘La Coruña’ [PGL, 16/12/2010]
- O juiz decano da Corunha denuncia o presidente da Mesa [PGL, 12/06/2009]
- Juiz defende ilegalidade [Velho PGL, 27/06/2008]
