PGL – Bieito Lobeira, deputado do grupo parlamentares do BNG na Câmara galega, enviou umha pergunta à Mesa do parlamento relativa a um informe da Conselharia da Educaçom e Ordenaçom Universitária referido à actividade da Plataforma Queremos Galego perante instituiçons europeias.
No comunicado, Lobeira dá conta dumha publicaçom de ‘El Correo Gallego’, do dia 16 de Abril, na qual se informa da existência de um informe oficial da Conselharia da Educaçom e Ordenaçom Universitária relativo à actividade que a Plataforma Queremos Galego desenvolveu, nos dias 13 e 14 de Abril, perante instituiçons europeias.
Segundo o referido jornal, o informe nom reflecte o acontecido, senom que avalia deliberadamente e de modo tendencioso os esforços de denúncia internacional sobre a situaçom da nossa língua, que tem em andamento este colectivo. Nesta linha, aponta Lobeira que «a manipulaçom vem sendo a pauta de conduta habitual do actual governo. Nestes âmbitos, nengumha surpresa». Porém, o deputado nacionalista destaca que o realmente grave desta questom é a própria «existência deste informe, assim como do seguimento que dele se deriva. A Conselharia da Educaçom nom tem na espionagem umha das suas funçons».
Por estas razons, o deputado nacionalista pergunta:
1 – Existe o informe oficial do que dá conta o referido jornal?
2 – Em caso afirmativo, quem o elaborou?
3 – Que realizou a espionagem?
4 – Que métodos fôrom utilizados?
5 – De quem é a responsabilidade política destes factos?
