PGL – Bieito Lobeira, porta-voz em matéria lingüística do Bloco Nacionalista Galego, apresentou à Junta umha pergunta para a sua resposta escrita relativa às razons de exclusom da língua galega na informaçom de painéis electrónicos das auto-estradas da Galiza.
No documento, Lobeira destaca que foi possível comprovar nos últimos dias que toda a informaçom visual subministrada polos painéis electrónicos das estradas e auto-estradas do país, relativa ao estado das vias, apariçom de neve ou gelo ou sugestom de adianto da volta ao lar por razom de condiçons climatológicas parecia exclusivamente em espanhol.
Desta maneira, e contrariamente do que vinha acontecendo, o galego ficou excluído, quando até o momento a nossa língua estava presente na maior parte dos painéis e alternando com o castelhano.
Na linha do apontado, Lobeira destaca que nom existindo razons que justifiquem a eliminaçom do galego na informaçom, como tampouco problemas de carácter tecnológico, «semelha que galegas e galegos nom possuem direito, na sua própria terra, de receberem informaçom no idioma próprio do país». Por todo isto, o deputado do BNG pergunta à Mesa do parlamento:
1 – Que dados possui a Secretaria Geral de Politica Lingüística sobre as razons que levárom à eliminaçom da língua galega na informaçom subministrada por painéis electrónicos nas estradas e auto-estradas?
2 – Que avaliaçom realiza destes factos?
3 – Tem previsto adoptar medidas na defensa do direito e a liberdade dos galegos e galegas a obterem informaçom sobre o estado das vias no idioma próprio do nosso país?
4 – Em caso positivo, em que consistiram, e em que tempo se farám efectivas?
